پەريزات قايرات ءىسى: Biz birgemiz قورىنىڭ قۇرىلتايشىلارى حاتتاماعا قول قويماعانىن ايتتى
استانا. KAZINFORM - ەلوردادا ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قور قۇرىلتايشىسى پەريزات قايراتقا قاتىستى سوت وتىرىسىندا كۋاگەرلەردەن جاۋاپ الىنىپ جاتىر.
سوت بارىسىندا كۋاگەرلەردىڭ ءبىرى سەرگەي ماتيۋشەنكودان جاۋاپ الىندى. ول - بۇرىن «جاس وتان» جاستار قاناتىندا (سول كەزدەگى Nur Otan پارتياسىنىڭ جانىنداعى) ۆولونتەر بولعان جانە «Biz birgemiz Qazaqstan-2030» قوعامدىق بىرلەستىگىنىڭ قۇرىلتايشىلارىنىڭ ءبىرى رەتىندە كورسەتىلگەن تۇلعا.
- پەريزات قايرات پاندەميا كەزىندە قايىرىمدىلىقپەن بەلسەندى اينالىستى، ياعني ماسكا تاراتىپ، وتباسىلارعا كومەك كورسەتتى. 2021-جىلى پەريزات مەنى كەڭسەگە شاقىرىپ، بىرلەستىكتى قۇرۋ تۋرالى حاتتامانى تاپسىردى. قۇجاتتا تۇلعالاردىڭ اتى-ءجونى مەن قولتاڭبالارى الدىن الا قويىلىپ تۇرعان ەدى. مەنىڭ قۇرىلتايشى بولۋعا كەلىسىمىمدى سۇراپ، قول قويۋىمدى ۇسىندى، - دەگەن تۇسىنىك بەردى سەرگەي ماتيۋشەنكو.
الايدا كۋاگەر ەكىنشى حاتتاماعا قاتىسى جوعىن ايتىپ، قۇجاتقا قويىلعان قولدى ءۇزىلدى-كەسىلدى جوققا شىعاردى. ودان ءارى كۇدىكتى پەريزات قايرات پەن كۋاگەر سەرگەي ماتيۋشەنكونىڭ اراسىندا كىشىگىرىم ديالوگ ءجۇردى.
- سەرگەي، سەن ەكىنشى حاتتاماعا قول قويعان جوقسىڭ با؟ قازىر مەنىڭ تاعدىرىم شەشىلىپ جاتقانىن تۇسىنەسىڭ بە؟
- پەريزات، مەن ەكىنشى حاتتاماعا قول قويعان جوقپىن.
ودان بولەك، سوت تەرگەۋى بارىسىندا «Biz birgemiz Qazaqstan-2030» قوعامدىق بىرلەستىگىنىڭ قۇرىلتايشىسى رەتىندە جاۋاپ بەرگەن تاعى ەكى كۋاگەر حاتتاماداعى قولدى مويىندامادى، ياعني ولار حاتتاماعا قول قويماعان.
سوت وتىرىسى جالعاسىپ جاتىر.
بۇعان دەيىن مەملەكەتتىك ايىپتاۋشى پەريزات قايرات پەن ونىڭ اناسىنا تاعىلعان ايىپتاردى تىزبەكتەپ شىقتى.
سۋديا سۇراعىنا جاۋاپ بەرگەن پەريزات قايرات ايىپتار نەگىزسىز تاعىلدى دەپ، مويىندامايتىنىن جەتكىزدى.
بۇرىنعى «Nur Otan» (قازىرگى Amanat) پارتياسى ءتوراعاسىنىڭ ءبىرىنشى ورىنباسارى بولعان، الماتى قالاسىنىڭ ەكس-اكىمى باۋىرجان بايبەكتىڭ ەسىمىن اتاپ ءوتتى.
مەملەكەتتىك ايىپتالۋشى پەريزات قايرات پەن اناسى عايني الاشبايەۆا 3,5 ميلليارد تەڭگەنىڭ قايدا جۇمسالعانىن تىزىپ بەردى.
ايتا كەتسەك، بۇعان دەيىن دە پەريزات قايرات وزىنە تاعىلعان ايىپتارمەن كەلىسپەدى.
سونداي-اق پەريزات قايرات تەرگەۋ يزولياتورى قىزمەتكەرلەرىنەن ءجابىر كورگەنىن ايتقان ەدى. ارتىنشا ەلوردا پوليتسياسى تەرگەۋ يزولياتورىندا بولعان جايتتىڭ ۆيدەوسىن كورسەتتى.
