قازاقستاننىڭ اۋىل شارۋاشىلىعى ءونىمىنىڭ قىتايعا ەكسپورتى 35 پايىزعا ارتتى
استانا. KAZINFORM - اۋىل شارۋاشىلىعى ءمينيسترى ايداربەك ساپاروۆ قازاقستانداعى ق ح ر-نىڭ توتەنشە جانە وكىلەتتى ەلشىسى حان چۋنلينمەن كەزدەسۋ وتكىزدى.
مينيسترلىك مالىمەتىنشە، كەزدەسۋ بارىسىندا تاراپتار اگرارلىق سالاداعى ەكىجاقتى ىنتىماقتاستىقتىڭ قازىرگى جاعدايى مەن بولاشاعىن تالقىلادى. مينيستر اۋىل شارۋاشىلىعى سالاسىنداعى ارىپتەستىك تۇراقتى وڭ ديناميكانى كورسەتىپ وتىرعانىن اتاپ ءوتتى.
2024 -جىلى ەكى ەل اراسىنداعى اۋىل شارۋاشىلىعى ونىمدەرىنىڭ تاۋار اينالىمى %10 ءوسىپ، 1,4 ميلليارد ا ق ش دوللارىنا جەتتى.
2025 -جىلدىڭ العاشقى بەس ايىندا ءوسىم %36 بولىپ، 736,9 ميلليون دوللارعا جەتتى. قازاقستاننان قىتايعا ەكسپورتتىڭ، سونداي-اق قىتايدان يمپورتتىڭ دا ارتۋى اگرارلىق ساۋدانىڭ تەڭگەرىمدى ءارى ءوزارا ءتيىمدى قۇرىلىمىنا دالەل بولىپ وتىر.
2024 -جىلدىڭ قورىتىندىسى بويىنشا قىتايعا اۋىل شارۋاشىلىعى ونىمدەرىنىڭ ەكسپورتى 1,1 ميلليارد ا ق ش دوللارىن قۇراپ، %4 عا ارتتى. ال 2025 -جىلدىڭ قاڭتار- مامىر ايلارىندا ەكسپورت %35- عا ءوسىپ، 513,4 ميلليون دوللارعا جەتتى. نەگىزگى ەكسپورتتىق پوزيتسيالارعا مال ازىعى (%485+، 1,2 ميلليون توننا)، وسىمدىك مايلارى (%26+، 173,3 مىڭ توننا) جانە بيداي كىرەدى.
- ءبىز ءۇشىن نەگىزگى ماسەلەلەردىڭ ءبىرى - سيىر ەتى، قوي ەتى جانە قوسالقى ونىمدەردى ەكسپورتتاۋعا قاتىستى جاڭارتىلعان حاتتامالارعا قول قويۋ. 2025 -جىلدىڭ مامىر ايىندا ق ح ر-نىڭ باس كەدەن باسقارماسىمەن قازاقستانداعى قىزىلشا جومىن وندىرەتىن كاسىپورىندارعا بىرلەسكەن ينسپەكسيا جۇرگىزۋ، سونداي-اق اقتوبە، قاراعاندى، شىعىس قازاقستان جانە اباي وبلىستارىن تەكسەرۋ ارقىلى قىتايعا بيداي مەن ارپا جەتكىزىلەتىن وڭىرلەردىڭ گەوگرافياسىن كەڭەيتۋ تۋرالى كەلىسىمگە قول جەتكىزىلدى. ءبىز وسى جىلدىڭ تامىز ايىندا قۇس شارۋاشىلىعى كاسىپورىندارىن ق ح ر تالاپتارىنا سايكەستىگى تۇرعىسىنان تەكسەرۋ جۇرگىزۋدى ۇسىنامىز، - دەدى ايداربەك ساپاروۆ.
كەزدەسۋ بارىسىندا ينۆەستيتسيالىق ىنتىماقتاستىققا ەرەكشە نازار اۋدارىلدى. قازىرگى تاڭدا قازاقستاندا قىتاي كاپيتالىنىڭ قاتىسۋىمەن جالپى قۇنى شامامەن 2,8 ميلليارد ا ق ش دوللارىن قۇرايتىن اۋىل شارۋاشىلىعى سالاسىنداعى 4 ءىرى جوبا جۇزەگە اسىرىلىپ جاتىر. بۇل قىتاي ينۆەستورلارى تاراپىنان جوعارى سەنىمنىڭ بار ەكەنىن جانە ستراتەگيالىق ارىپتەستىكتى تەرەڭدەتۋگە قوسىمشا ىنتالاندىرۋ جاسايتىنىن كورسەتەدى.
ق ح ر-نىڭ توتەنشە جانە وكىلەتتى ەلشىسى حان چۋنلين ەكى ەل اراسىنداعى اۋىل شارۋاشىلىعى سالاسىنداعى ءوزارا ءىس-قيمىل دەڭگەيىنىڭ جوعارى ەكەنىن اتاپ ءوتىپ، قىتاي تاراپىنىڭ ءوزارا ساۋدا كولەمىن ارتتىرۋعا جانە ينۆەستيتسيالار، سانيتاريالىق- ۆەتەريناريالىق باقىلاۋ مەن اگرارلىق يننوۆاتسيالار باعىتىندا ىنتىماقتاستىقتى كەڭەيتۋگە مۇددەلىلىك تانىتىپ وتىرعانىن جەتكىزدى.
كەزدەسۋ سوڭىندا تاراپتار اگرارلىق سالاداعى جان-جاقتى جانە ءوزارا ءتيىمدى ىنتىماقتاستىقتى ودان ءارى دامىتۋعا دايىن ەكەندەرىن راستادى.
