ۇرىمجىدەن ۆەلوسيپەدپەن جولعا شىققان قازاق قىزى استاناعا جەتتى
استانا. KAZINFORM - قىتايدىڭ ءۇرىمجى قالاسىنان ۆەلوسيپەدپەن جولعا شىققان بۇرلەن ەسىمدى 20 جاستاعى قازاق قىزى بۇگىن استاناعا جەتىپ، ساپارىن اياقتادى، دەپ حابارلايدى قازاقپارات ءتىلشىسى.
بۇرلەن ادىلەت قىزى - شينجاڭ ولكەسى، ءدوربىلجىن اۋدانىنىڭ تۋماسى. بيىل جوعارى وقۋ ورنىن باعدارلاما جاساقتاۋشى ماماندىعى بويىنشا ءتامامداعان.
ول قازاقستان - قىتاي اراسىنداعى ىنتىماقتاستىقتى قولداۋ ماقساتىندا ساپارعا شىققان. قازاق قىزى 2 مىڭ شاقىرىمىنان استام جول ءجۇرىپ، بۇگىن ەلورداعا جەتتى. الىستان كەلگەن بۇرلەندى ەلوردا جۇرتشىلىعى، ەرەكشە ىقىلاسپەن قارسى الىپ، شاشۋ شاشىپ، قىمىز ۇسىندى.
«استاناعا امان-ەسەن جەتىپ، سىزدەردى كورگەنىمە وتە قۋانىشتىمىن. قارسى الىپ جاتقان ىقىلاستارىڭىزعا كوپ راحمەت. بۇل ساپاردى كوپتەن بەرى ويلاستىرپ ءجۇر ەدىم. تاۋەكەلگە بەل بۋىپ، 21-شىلدە ءۇرىمجى قالاسىنان جولعا شىقتىم. باستى ماقساتىم - ەكى ەلدىڭ دوستىعىن ناسيحاتتاۋ. بيىل «ءبىر بەلدەۋ، ءبىر جول» جوباسىنا 10 جىل تولىپ وتىر. قازاقستان مەن قىتاي اراسىنداعى ۆيزاسىز رەجيم ورناعاننان بەرى، ساياحاتشىلاردىڭ سانى ارتىپ كەلەدى. ەكى ەل اراسىنداعى دوستىق نىعايا بەرسىن دەپ تىلەيمىن»، - دەدى قازاق قىزى.
ونىڭ ايتۋىنشا، كۇننىڭ ىستىعى مەن جولداعى كەدەرگىلەر ساپار كەزىندە قيىندىق تۋدىرعان.
«بۇل - ۆەلوسيپەدپەن شىققان العاشقى ساياحاتىم. كۇنىنە 100-150 شاقىرىم جول ءجۇرىپ وتىردىم. كۇننىڭ ىستىعى ازداپ قيىندىقتار تۋدىردى. قىزۋىم كوتەرىلىپ، اۋىرعان كۇندەرىم بولدى. اۋەلدە جۋان دوڭگەلەكتى ۆەلوسيپەدپەن شىققانمىن. ءبىراق ول باياۋ جۇرەتىندىكتەن جىڭىشكە دوڭگەلەككە اۋىستىردىم. جولدا تاس، اينەك كىرىپ، دوڭعالاعىم جارىلىپ، شىنجىرىم ىستەن شىققان كەزدەر بولدى. ءبارىن ءوزىم جوندەپ الدىم. تاڭعى بەستەردە شىعىپ، تۇندە ايالداپ وتىردىم.
جولداعى قاڭعىباس يتتەردەن قاشقان كەزدەرىم بار. الدىمنان كەزدەسكەن ادامداردىڭ بارلىعى قولداۋ ءبىلدىرىپ، سۋىن بەرىپ، تاماعىمەن ءبولىسىپ، كومەكتەرىن كورسەتىپ جاتىر. «جول ازابىن جۇرگەن بىلەدى» دەمەكشى، بۇل ساپار قيىندىعى مەن قىزى مول، ءومىرىمنىڭ ءبىر بەلەسى رەتىندە ەستەقالارلىق ەرەكشە كۇنگە اينالارى ءسوزسىز. قازاقتىڭ كەڭ دالاسىن كورىپ، كوركەم تابيعاتىنا ءتانتى بولدىم»، - دەيدى بۇرلەن ادىلەت قىزى.
ءىس-شاراعا ارنايى كەلگەن «دۇنيەجۇزى قازاقتارى قاۋىمداستىعى» استانا قالالىق فيليالىنىڭ باسشىسى عالىم ۇلكەنباي ۇلى، بۇرلەندى جەڭىسىمەن قۇتتىقتاپ، العىس حات جانە اقشالاي سەرتيفيكات تابىستادى.
اۆتور
ريزابەك نۇسىپبەك ۇلى
