ەۆرەي تەكتى تۋريست ەجەلگى ريم مۇسىندەرىن قيراتقانى ءۇشىن قاماۋعا الىندى

 يزرايل پوليتسياسى يەرۋساليم مۇراجايىندا ونەر تۋىندىلارىن ادەيى ەدەنگە قۇلاتىپ، ەكىنشى عاسىردا جاسالعان ەكى ريم كەزەڭىنە جاتاتىن مۇسىنگە زاقىم كەلتىرگەن امەريكالىق تۋريستى قاماۋعا الدى. قازاقپارات ءتىلشىسى بۇل تۋرالى Associated Press اگەنتتىگىنە سىلتەمە جاساپ حابارلايدى. 

5-قازان كۇنى كەشكە ورىن العان ۆانداليزم ارەكەتى يەرۋساليمدەگى مادەني مۇراعا شابۋىلداردىڭ كۇشەيۋى كەزىندە يزرايلدىڭ باعا جەتپەس كوللەكسيالارىنىڭ قاۋىپسىزدىگىنە قاتىستى سۇراقتار تۋعىزدى.

پوليتسيا كۇدىكتىنىڭ كىم ەكەنىن انىقتادى. ول ەۆرەي تەكتى 40 جاستاعى امەريكاندىق تۋريست بولىپ شىقتى. العاشقى سۇرالعاندا ول مۇسىندەردى «پۇتقا تابىنۋشىلىق جانە تاۋراتقا قايشى» دەپ ساناعاندىقتان سىندىرعانى بەلگىلى بولدى.

ۇستالعان ەر ادامنىڭ ادۆوكاتىنىڭ ايتۋىنشا، تۋريستىڭ پسيحيكالىق اۋىتقۋى بولعان. رەسمي تۇلعالار پسيحياتريالىق ساراپتامادان ءوتۋى ءتيىس ايىپتالۋشىنىڭ اتى-ءجونىن جاريالامادى.

ارحەولوگيا، بەينەلەۋ ونەرى، ەۆرەي ونەرى جانە كۇندەلىكتى تۇرمىس كورسەتىلگەن ايگىلى يزرايل مۇراجايى بەيسەنبى كۇنگى ۆانداليزمدى «الاڭداتاتىن جانە ادەتتەن تىس وقيعا» دەپ اتاپ، «زورلىق-زومبىلىقتىڭ بارلىق ءتۇرىن ايىپتايتىنىن جانە ۇقساس وقيعالار قايتالانبايتىنىنا ۇمىتتەنەتىنىن» مالىمدەدى.

مۇراجاي قيراعان مۇسىندەردىڭ قۇنىن ايتۋدان باس تارتتى. ول جۇما كۇنى تاڭەرتەڭ كوپشىلىككە ەسىگىن اشتى.