رومان سكليار قىتايلىق China Datang Corporation Ltd كومپانياسىنىڭ وكىلدەرىمەن كەزدەستى

استانا. KAZINFORM - پرەمەر-ءمينيستردىڭ ءبىرىنشى ورىنباسارى رومان سكليار ق ح ر- داعى ەلەكتر ەنەرگياسىن ءىرى وندىرۋشىلەردىڭ ءبىرى قىتايلىق China Datang Corporation Ltd كومپانياسى وكىلدەرىمەن كەزدەستى.

كومپانيا ءوز قىزمەتىن الەمنىڭ 10 نان استام ەلىندە، سونىڭ ىشىندە ميانما، كامبودجا، لاوس، يندونەزيا، وزبەكستان جانە سينگاپۋردا جۇزەگە اسىرادى. كومپانيانىڭ ءوندىرۋشى نىساندارىنىڭ جالپى بەلگىلەنگەن قۋاتى 190 گ ۆ ت- تان اسادى، ونىڭ شامامەن %50 جاڭارتىلاتىن ەنەرگيا كوزدەرى.

China Datang Corporation Ltd ون ءتورت جىل قاتارىنان Fortune Global 500 تىزىمىنە ەنىپ كەلەدى.

تالقىلاۋ بارىسىندا رومان سكليار قازاقستان ۇكىمەتىنىڭ ەنەرگەتيكا سالاسىن دامىتۋ، ونىڭ ىشىندە ينۆەستيتسيا تارتۋ بويىنشا جۇرگىزىپ جاتقان جۇمىسى تۋرالى اتاپ ءوتتى.

ەلەكتر جانە جىلۋ ەنەرگەتيكاسىندا جاڭا قۋاتتار ەنگىزۋ قاجەتتىگىنە ەرەكشە نازار اۋدارىلدى.

سونداي-اق قىتايلىق كومپانيانىڭ ارالاس ەلەكتر ستانساسىن سالۋ جوباسىن ىسكە اسىرۋ ماسەلەلەرى تالقىلاندى.

سونىمەن قاتار كومىر حيمياسى سالاسىنداعى ىنتىماقتاستىق ماسەلەلەرى قارالدى.

كەڭەس قورىتىندىسى بويىنشا مەملەكەتتىك ورگاندار مەن ۇيىمدارعا قىتاي كورپوراتسياسى باستامالارىن پىسىقتاۋ بويىنشا ءبىرقاتار تاپسىرما بەرىلدى.