پروكۋرور پەريزات قايراتتى 10 جىل، اناسىن 8 جىل باس بوستاندىعىنان ايىرۋدى سۇرادى

استانا. KAZINFORM - استانا سوتىندا پروكۋرورلار «Birgemiz» قايىرىمدىلىق قورىنىڭ بۇرىنعى جەتەكشىسى، ۆولونتەر پەريزات قايرات پەن ونىڭ اناسى عايني الاشبايەۆاعا قاتىستى قانداي جازا سۇرايتىنىن مالىمدەدى.

پروكۋرور ارمان قىزىكەن سوتتالۋشىلارعا قىلمىستىق جولمەن تابىلعان مۇلىكتى تاركىلەپ، ناقتى مەرزىممەن باس بوستاندىعىنان ايىرۋ جازاسىن تاعايىنداۋدى تالاپ ەتتى.

ايىپتاۋ تاراپىنىڭ ۇستانىمى بويىنشا:

پەريزات قايراتقا - 10 جىل باس بوستاندىعىنان ايىرۋ،

عاني الاشبايەۆاعا 8 جىل باس بوستاندىعىنان ايىرۋ جازاسى سۇرالدى.

سونىمەن بىرگە، مەملەكەتتىك ايىپتاۋ قىلمىستىق جولمەن الىنعان قاراجاتقا ساتىپ الىنعان مۇلىكتى تاركىلەۋدى تالاپ ەتىپ وتىر. تاركىلەنگەن مۇلىكتەن تۇسكەن قاراجات جابىرلەنۋشىلەرگە بەرىلمەك.

تەرگەۋ اياسىندا پەريزات قايرات پەن عاني الاشبايەۆا ق ر قىلمىستىق كودەكسىنىڭ مىناداي باپتارى بويىنشا ايىپتالىپ وتىر:

190-باپ، 4- ءبولىم، 2-تارماق - اسا ءىرى مولشەردەگى الاياقتىق؛

218-باپ، 2- ءبولىم، 1-تارماق - قىلمىستىق جولمەن الىنعان اقشانى جانە (نەمەسە) وزگە مۇلىكتى ادامدار توبىنىڭ الدىن الا ءسوز بايلاسۋى ارقىلى زاڭداستىرۋ (جىلىستاتۋ)؛

218-باپ، 3- ءبولىم، 3-تارماق - اسا ءىرى مولشەردە قىلمىستىق جولمەن الىنعان اقشانى جانە (نەمەسە) وزگە مۇلىكتى ادامدار توبىنىڭ زاڭداستىرۋى (جىلىستاتۋى).

بۇعان دەيىن سوتتاعى ءسوزجارىستا مەملەكەتتىك ايىپتاۋشى مادينا ورازالينا پەريزات قايراتتىڭ ءىسى الەۋمەتتىك تۇرعىدان سەزىمتال تاقىرىپتاردى باس پايداسىنا قولدانۋعا تىرىساتىندارعا ساباق بولۋى كەرەگىن ايتقان ەدى.