«ەۆروحيم» كومپانياسى جامبىل وبلىسىندا حيميالىق كەشەن سالماق
استانا. KAZINFORM - «ەۆروحيم» كومپانياسى قازاقستاندا اۋقىمدى ينۆەستيتسيالىق جوبانى ىسكە اسىرۋدى جالعاستىرۋدا. بۇل جولى جامبىل وبلىسىندا بىرەگەي حيميا كەشەنىن سالۋ تۋرالى كەلىسىمشارتقا قول قويىلدى.
بۇگىن ەلوردادا «ەۆروحيم» مينەرالدى حيميا كومپانياسى قىتايلىق CNCEC (China National Engineering Company) كومپانياسىمەن جاڭاتاس قالاسىندا (جامبىل وبلىسى) حيميالىق كەشەندى جوبالاۋعا، سالۋعا جانە پايدالانۋعا بەرۋگە كەلىستى.
ينۆەستيتسيالىق جوبا - قازاقستان رەسپۋبليكاسى بۇرىنعى يندۋستريا جانە ينفراقۇرىلىمدىق دامىتۋ ءمينيسترىنىڭ بۇيرىعىمەن جانە رەسەي مەن قازاقستان ۇكىمەتى اراسىنداعى كەلىسىممەن بەكىتىلگەن يندۋستريالاندىرۋدىڭ ءبىرىڭعاي كارتاسىنا سايكەس ىسكە اسىرىلادى.
كەلىسىمشارتقا قول قويۋ راسىمىندە قازاقستان رەسپۋبليكاسىنىڭ ونەركاسىپ جانە قۇرىلىس ءمينيسترى قانات شارلاپايەۆ جوبانىڭ ءوڭىردىڭ اۋىل شارۋاشىلىعى مەن ەكونوميكاسىن دامىتۋعا قوساتىن ەلەۋلى ۇلەسىن اتاپ ءوتتى.
«ءوندىرىستىڭ قاۋىپسىزدىگى جەر نەمەسە سۋدىڭ بولۋىنان باستالمايدى. بۇل ونىڭ نەگىزى، ءبىراق شىنىمەن دە ءوندىرىستىڭ قاۋىپسىزدىگىن قامتاماسىز ەتۋ ءۇشىن تىڭايتقىش قاجەت. سوندىقتان ءبىز ءۇشىن بۇل وتە ماڭىزدى جوبا. ءبىز ونى ەۆروحيم كومپانياسى جانە قىتايلىق سەرىكتەستەرمەن بىرگە جۇزەگە اسىرامىز. بۇل ەۋرازيالىق كووپەراتسيانىڭ ايتارلىقتاي ۇلگىسى. ياعني ايماقتىق ءوندىرىس قاۋىپسىزدىگى ءۇشىن بۇل وتە ماڭىزدى وقيعا»، - دەدى مينيستر.
قازاقستانداعى «ەۆروحيم» كومپانياسىنىڭ ينۆەستيتسيالىق جوباسى ءۇش كەزەڭنەن تۇرادى. ءبىرىنشى كەزەڭدە جىلىنا 640 مىڭ توننا فوسفوريت ۇنىن وندىرەتىن تاۋ- كەن كەشەنى سالىندى. ەكىنشى كەزەڭدە، 2026 -جىلى پايدالانۋعا بەرىلەتىن كۇكىرت قىشقىلى ءوندىرىسىنىڭ قۇرىلىسىن، ال ءۇشىنشى جوبا 2027 -جىلى ىسكە قوسىلاتىن حيميالىق كەشەن سالۋدى كوزدەيدى. جوبانى ىسكە اسىرۋعا جالپى كولەمى 1 ميلليارد دوللار ينۆەستيتسيا سالىنىپ وتىر.
سونداي- اق، جاڭا كاسىپورىندا 2400 دەن استام جاڭا جۇمىس ورنى اشىلىپ، ونىڭ كەمىندە %80 قازاقستان ازاماتتارى بولادى دەپ جوسپارلانىپ وتىر.
قازاقستانداعى «ەۆروحيم» كومپانياسىنىڭ جاڭا حيميالىق كەشەنى - مينەرالدى تىڭايتقىشتار، حيميالىق ونىمدەردىڭ اسسورتيمەنتى جانە جالپى ءوندىرىستىڭ جيىنتىق قۋاتى بويىنشا بىرەگەي كاسىپورىن بولماق. وسىلايشا شىعارىلاتىن ءونىمنىڭ جىلدىق كولەمى 1 ميلليون توننادان استام مينەرالدى تىڭايتقىشتار مەن ونەركاسىپتىك ونىمدەردى قۇرايدى.
«قازاقستان - «ەۋروحيم» ءۇشىن ورتالىق ازيا نارىعىنداعى باستى ەل. ال ءبىز ءۇشىن، ينۆەستور رەتىندە ەڭ تارتىمدى مەملەكەت. جاڭادان سالىناتىن حيميالىق كەشەننىڭ تىڭايتقىشتارى اۋىل شارۋاشىلىعىن جانە ەلدىڭ ەكسپورتتىق الەۋەتىن دامىتۋدا ماڭىزدى ءرول اتقارادى دەپ ەسەپتەيمىز. مەنشىكتى ديستريبۋتسيا جەلىسى جانە ءبىزدىڭ «كەنىشتەن فەرماعا دەيىن» جۇمىس ىستەۋ قاعيداتى اگرارشىلاردىڭ جوعارى ساپالى تىڭايتقىشتارعا قول جەتكىزۋىن قامتاماسىز ەتە وتىرىپ، قازاقستاننىڭ جانە ايماقتاعى باسقا دا ەلدەردىڭ اۋىل شارۋاشىلىعى ونىمدەرىن ءوندىرۋ كولەمىن ۇلعايتۋعا ىقپال ەتەدى»، - دەدى «ەۋروحيم» كومپانياسىنىڭ پرەزيدەنتى ولەگ شيريايەۆ.
«ەۋروحيم» - رەسەيدەگى مينەرالدى تىڭايتقىشتار وندىرىسىندەگى ەڭ ءىرى ينۆەستور. كومپانيانىڭ حيميا جانە تاۋ-كەن سالاسىندا ءىرى جوبالاردى ءساتتى جۇزەگە اسىرۋدا كوپ جىلدىق تاجىريبەسى بار. سوڭعى بىرنەشە جىلدا كومپانيا رەسەي فەدەراتسياسىندا ءبىرقاتار جاڭا وندىرىستىك كاسىپورىندى ىسكە قوستى. اتاپ ايتقاندا، لەنينگراد وبلىسىنداعى «ەۆروحيم»- سولتۇستىك-باتىس اممياك زاۋىتى، پەرم ولكەسىندەگى ۋسول كالي كومبيناتى جانە ۆولگوگراد وبلىسىنداعى «ۆولگا كالي» زاۋىتى. كومپانيا لەنينگراد وبلىسىنداعى» ەۆروحيم - سولتۇستىك- باتىس-2» اممياك جانە كارباميد ءوندىرۋ زاۋىتىنىڭ قۇرىلىسىن، ستاۆروپول ولكەسىندە كالي نيتراتىنىڭ ءوندىرىسىن جۇرگىزۋدە. 2024 -جىلعى ناۋرىز ايىندا كومپانيا برازيليادا فوسفاتتى تىڭايتقىشتار وندىرەتىن زاماناۋي كەشەندى ىسكە قوستى.
CNCEC - مۇناي- حيميا سالاسى كاسىپورىندارىن، ونىڭ ىشىندە قازاقستاندا قۇرىلىس بويىنشا تاجىريبەسى مول جەتەكشى ونەركاسىپتىك- ينجينيرينگتىك كومپانيالاردىڭ ءبىرى.
