ەۋروپاداعى سۋ تاسقىنىنان قازا تاپقاندار سانى ارتىپ بارادى
استانا. KAZINFORM - «بوريس» داۋىلى ورتالىق جانە شىعىس ەۋروپادا جويقىن سۋ تاسقىنىن تۋعىزىپ، كوپتەگەن ادامنىڭ قازا بولۋى مەن ايتارلىقتاي شىعىنعا اكەلدى، دەپ حابارلايدى Kazinform ءتىلشىسى.
داۋىل اۋسترياداعى ءورت ءسوندىرۋشى مەن پولشادا سۋعا كەتكەن ەر ادامنىڭ ءومىرىن قيدى. رۋمىنيا دا قاتتى زارداپ شەكتى: تابيعي اپاتتان بەس ادام قازا بولدى، چەحيادا بىرنەشە ادام ءىز-ءتۇزسىز جوعالىپ كەتتى.
اۋستريادا ۆەنانىڭ اينالاسى اپات ايماعى دەپ جاريالاندى، كوشباسشىلار جاعدايدى «بۇرىن-سوڭدى بولماعان» دەپ سيپاتتايدى.
پولشا پرەمەر- ءمينيسترى دونالد تۋسك ەڭ قاتتى زارداپ شەككەن اۋدانداردا تابيعي اپات رەجيمىن جاريالادى. نەبارى ءۇش كۇننىڭ ىشىندە چەحيانىڭ كەيبىر اۋداندارىندا ءۇش ايلىق نورماعا سايكەس كەلەتىن جاۋىن-شاشىن جاۋعان، بۇل ەۆاكۋاتسياعا جانە ءتورت ادام ءىز-ءتۇزسىز جوعالۋىنا اكەلدى.
بىرنەشە ايماقتىڭ تۇرعىندارى ءبىرىنشى تولقىننىڭ سالدارىن جويۋ جۇمىستارىن جۇرگىزىپ، سۋ تاسقىنىنا دايىندالىپ جاتىر. جولدار مەن تەمىر جولداردى سۋ باسىپ، ەلەكتر قۋاتىنىڭ ءۇزىلۋى مىڭداعان ادامدى جارىقسىز قالدىردى.
«بوريس» داۋىلى سولتۇستىكتىڭ سالقىن اۋاسى جەرورتا جانە قارا تەڭىزدەردىڭ جىلى سۋلارىنىڭ ىلعالىمەن ارالاسىپ، كۇردەلى مەتەورولوگيالىق جۇيەنىڭ اسەرىنەن كۇشەيە ءتۇستى. ساراپشىلاردىڭ ايتۋىنشا، كليماتتىڭ وزگەرۋىنەن ەۋروپادا مۇنداي توتەنشە قۇبىلىستار ءجيى قايتالانىپ، كۇردەلەنىپ جاتىر.
جاڭبىر جالعاسىپ جاتقاندىقتان، بيلىك وكىلدەرى شىعىندى ازايتۋ جانە كوتەرىلگەن تاسقىن سۋىنىڭ استىندا قالعانداردى قۇتقارۋ ءۇشىن تاۋلىك بويى جۇمىس جۇرگىزىپ جاتىر.
