رەسەيمەن گاز كەلىسىمى تاياۋ شىعىستىڭ مۇددەسىن كوزدەيدى - موحامماد موحبەر
استانا. KAZINFORM - رەسەي مەن يران جان- جاقتى ىنتىماقتاستىق تۋرالى مەملەكەتارالىق كەلىسىمگە قول قويۋ الدىندا تۇر، ونىڭ ءبىر بولىگى 26-ماۋسىمدا تەگەراندا يرانعا رەسەيلىك گازدى جەتكىزۋدى ۇيىمداستىرۋدى ازىرلەۋ تۋرالى مەموراندۋمعا قول قويۋ بولدى.
سارسەنبى كۇنى «گازپروم» باسقارما ءتوراعاسى الەكسەي ميللەر باستاعان دەلەگاتسيانىڭ يرانعا ساپارى اياسىندا يرانعا رەسەيلىك گاز جەتكىزۋدى ۇيىمداستىرۋدى دامىتۋ بويىنشا ستراتەگيالىق مەموراندۋمعا قول قويىلدى. ول رەسپۋبليكانىڭ مۇناي ءمينيسترى دجاۆاد وۋدجيمەن كەزدەسۋ وتكىزدى.
يران پرەزيدەنتىنىڭ مىندەتىن اتقارۋشى موحامماد موحبەر سارسەنبى كۇنى رەسەي پرەزيدەنتى ۆلاديمير پۋتينمەن تەلەفون ارقىلى سويلەسۋىندە مەموراندۋمعا قول قويۋدى ەكى ەل اراسىنداعى قارىم- قاتىناستاردى تەرەڭدەتۋ جولىنداعى ماڭىزدى قادام جانە ايماقتىڭ ەكونوميكالىق دامۋى ءۇشىن ءتيىمدى شارا دەپ اتادى.
- بۇل جوسپاردى جۇزەگە اسىرۋ ەكى ەلدىڭ ەكونوميكالىق مۇددەسىن عانا ەمەس، بۇكىل ايماقتىڭ مۇددەسىن قامتاماسىز ەتەدى، - دەدى يران پرەزيدەنتىنىڭ مىندەتىن اتقارۋشى.
موحبەر ەكى ەل اراسىنداعى كەلىسىمدەردىڭ ورىندالۋ بارىسىنا قاناعاتتانعانىن ايتتى، سونىمەن قاتار ەكى ەلدىڭ ايماقتى تۇراقتاندىرۋعا باعىتتالعان كۇش-جىگەرى قاجەتتى ناتيجە بەرەتىنىنە سەنىم ءبىلدىردى. ول سونداي- اق تەگەران مەن ماسكەۋ كەلىسسوزدەرىنىڭ ماڭىزدىلىعىن اتاپ ءوتتى.
گازپرومنىڭ باس ديرەكتورى، رەسەي فەدەراتسياسى پرەزيدەنتىنىڭ ارنايى وكىلى الەكسەي ميللەرمەن كەزدەسۋ بارىسىندا موحامماد موحبەر رەسەي گازىن يرانعا ەكسپورتتاۋ تۋرالى ءوزارا تۇسىنىستىك تۋرالى مەموراندۋمعا قول قويۋ ايماقتىڭ قاۋىپسىزدىگى مەن ەكونوميكاسىن ارتتىرۋ ءۇشىن ماڭىزدى قادام ەكەنىن ايتتى.
بۇعان دەيىن يراننىڭ مۇناي ءمينيسترى دجاۆاد ودجي رەسەي، كاتار جانە تۇركىمەنستانمەن بىرلەسىپ ەل اۋماعىندا گاز حابىن قۇرۋدى جوسپارلاپ وتىرعانىن ايتقان بولاتىن.
