رەسەيدىڭ سانكت-پەتەربۋرگ قالاسىندا شەتەل ازاماتتارىنا تاكسي جۇرگىزۋگە تىيىم سالىندى
سانكت-پەتەربۋرگ گۋبەرناتورى الەكساندر بەگلوۆ 2025 -جىلدىڭ اياعىنا دەيىن پاتەنتپەن جۇمىس ىستەيتىن شەتەل ازاماتتارىنا تاكسي جۇرگىزۋگە تىيىم سالدى، دەپ حابارلايدى turkystan باسىلىمى kz rbc.ru-عا سىلتەمە جاساپ.
جاڭا قاۋلىعا سايكەس، تاكسي قىزمەتىن ۇسىناتىن كومپانيالار الداعى ءۇش اي ىشىندە پاتەنتپەن جۇمىس ىستەيتىن ميگرانتتاردى جۇمىستان شىعارىپ، ولاردىڭ ورنىنا باسقا قىزمەتكەرلەردى قابىلداۋعا ءتيىس. قاۋلى جەكە تاسىمالداۋ جانە جۇرگىزۋشىسى بار اۆتوكولىك جالداۋ (وكۆەد) قىزمەتتەرىمەن اينالىساتىن كومپانيالارعا قاتىستى.
رەسمي مالىمدەمەدە بۇل شەشىم تاكسي قىزمەتتەرىنىڭ ساپاسى مەن قاۋىپسىزدىگىن ارتتىرۋعا، سونداي-اق رەسەي ازاماتتارى ءۇشىن جۇمىس ورىندارىن كوبەيتۋگە باعىتتالعانى ايتىلعان. قاۋلى 10 كۇن ىشىندە كۇشىنە ەنەدى.
بۇعان دەيىن سانكت-پەتەربۋرگ بيلىگى پاتەنتپەن جۇمىس ىستەيتىن ميگرانتتاردى تەك تاكسي عانا ەمەس، جەتكىزۋ قىزمەتتەرىنەن دە شەكتەۋدى جوسپارلاعان بولاتىن. كۋرەرلىك قىزمەت وكىلدەرىنىڭ ايتۋىنشا، مۇنداي شەكتەۋلەر ەنگىزىلگەن جاعدايدا قالادا كۋرەرلەردىڭ ەڭبەكاقىسى ەلىمىز بويىنشا ەڭ جوعارى دەڭگەيگە جەتۋى مۇمكىن، ال جەتكىزۋ باعاسى ەكى ەسە قىمباتتاۋى ىقتيمال.
تاكسي تاريفتەرى 10- 50 پايىز ارالىعىندا ءوسىپ، كولىك كۇتۋ ۋاقىتى دا ارتادى دەپ بولجانىپ وتىر.
ايتا كەتەيىك، مۇنداي شەكتەۋلەر بۇعان دەيىن رەسەيدىڭ باسقا وڭىرلەرىندە دە ەنگىزىلگەن. مىسالى، نيجەگورود وبلىسىندا پاتەنتپەن جۇمىس ىستەيتىن ميگرانتتارعا كۋرەر، دارىگەر، قوعامدىق تاماقتانۋ سالاسىنىڭ قىزمەتكەرى بولىپ جۇمىس ىستەۋگە تىيىم سالىنسا، يامالدا ولار ءۇشىن كولىك سالاسىندا جۇمىس ىستەۋگە شەكتەۋ بار.
سانكت-پەتەربۋرگ ۆيتسە-گۋبەرناتورى يگور پوتاپەنكونىڭ مالىمەتىنشە، 2024 -جىلى قالاداعى تىركەلگەن ميگرانتتار سانى %60 ازايعان. قازىر قالادا شامامەن 210 مىڭ ميگرانت تۇرىپ جاتىر، ونىڭ ىشىندە 21 مىڭدايى - بالالار. بۇل ازايۋدى ول قۇقىق قورعاۋ ورگاندارى تاراپىنان باقىلاۋدىڭ كۇشەيۋىمەن بايلانىستىردى.
پاتەنت - ە ا ە و قۇرامىنا كىرمەيتىن ەلدەردەن (مىسالى، تاجىكستان، وزبەكستان، ازەربايجان، مولدوۆا) كەلگەن ەڭبەك ميگرانتتارىنا رەسەيدە جۇمىس ىستەۋگە مۇمكىندىك بەرەتىن رەسمي قۇجات. ونىڭ ارەكەت ەتۋى ءۇشىن اي سايىن 6000 رۋبل كولەمىندە اۆانس سالىعىن تولەۋگە ءتيىس. الايدا ساراپشىلاردىڭ ايتۋىنشا، تاكسي جۇرگىزۋشىلەرىنىڭ كوبى بۇل پاتەنتسىز جۇمىس ىستەيدى.
