رەسەيدە ورىس ءتىلى جانە ورىس تاريحىن بىلمەيتىن ميگرانت دارىگەرلەر مەن جۇرگىزۋشىلەر جۇمىسقا قابىلدانبايدى
استانا. KAZINFORM - رەسەيدىڭ ەڭبەك مينيسترلىگى زاڭ جوباسىنا تۇزەتۋلەر ەنگىزدى، وعان سايكەس جۇرگىزۋشى، ساتۋشى جانە مەديتسينا قىزمەتكەرى لاۋازىمدارىنا قابىلداناتىن ميگرانتتار ورىس ءتىلى مەن ورىس تاريحىن ءبىلۋ بويىنشا تەست تاپسىرۋ تالابىنان بوساتىلمايدى، دەپ حابارلايدى ت ا س س.
بۇل تۋرالى رف مەملەكەتتىك دۋماسىنىڭ ەڭبەك جونىندەگى كوميتەتىنىڭ وتىرىسىندا رف مەملەكەتتىك حاتشىسى - ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى اندرەي پۋدوۆ ءمالىم ەتتى.
بۇعان دەيىن جالپى وتىرىستا مەملەكەتتىك دۋما دەپۋتاتتارى رەسەي فەدەراتسياسىندا مينيسترلەر كۆوتاسى بويىنشا جۇمىس ىستەيتىن ميگرانتتاردى ورىس ءتىلى مەن رەسەي تاريحىن بىلۋگە ارنالعان تەست تاپسىرۋ تالابىنان بوساتاتىن زاڭ جوباسىن ەكىنشى وقىلىمدا قابىلداعان بولاتىن. مەملەكەتتىك دۋما ءتوراعاسى ۆياچەسلاۆ ۆولودين رەسەي فەدەراتسياسىنا ۇكىمەتتىك كۆوتا بويىنشا ميگرانتتار شاقىرىلاتىن ماماندىقتار تىزىمىنە بايلانىستى ىشكى ىستەر مينيسترلىگىنە ەڭبەك جانە حالىقتى الەۋمەتتىك قورعاۋ مينيسترلىگىنىڭ جۇمىسىن مۇقيات قاراۋدى ۇسىندى.
- نەگە ءتىلدى بىلمەۋى مۇمكىن ادامداردى تىزىمگە ەنگىزۋدى ۇسىنىپ وتىرسىز. جۇرگىزۋشىلەر سياقتى ساناتتار ساتۋشىلار سياقتى سويلەسۋى كەرەك، ءتىلدى ءبىلۋى كەرەك، زاڭداردى ءبىلۋى كەرەك، - دەدى ۆولودين.
«سايكەسىنشە، ءبىز ەڭبەك مينيسترلىگىنىڭ ەكى بۇيرىعىن دايىندادىق. ەڭبەك مينيسترلىگىنىڭ ءبىرىنشى بۇيرىعىندا مەديتسينا قىزمەتكەرلەرى شەتەل ازاماتتارى - وسىندا كۆوتادان تىس جۇمىس ىستەۋگە رۇقساتپەن كەلە الاتىن بىلىكتى ماماندار تىزىمىنەن شىعارىلدى»، - دەپ ءتۇسىندىردى پۋدوۆ.
سونىمەن قاتار، ەڭبەك مينيسترلىگىنىڭ بۇيرىعىندا وزگەرىستەر قاراستىرىلعان، وعان سايكەس رەسەي فەدەراتسياسىنىڭ سۋبەكتىلەرى كۆوتا لاۋازىمدارىنا وتىنىمدەردى قالاي قالىپتاستىراتىنىن انىقتايدى. وسىلايشا، ەندى كۆوتالار رەسەي فەدەراتسياسىنىڭ ازاماتتارىمەن الەۋمەتتىك قارىم-قاتىناس كوزدەيتىن كاسىپتەردە جۇمىس ىستەيتىندەر ءۇشىن جۇمىس بەرۋشىلەردىڭ وتىنىمدەرىن قامتۋى مۇمكىن ەمەس.
ەسكە سالا كەتەيىك، بۇعان دەيىن رەسەيدە نەسيەنى كەشىكتىرىپ تولەيتىندەر كوبەيدى.
اۆتور
ەركەجان سماعۇلوۆا
