رەسەيدە ستۋدەنتتەردىڭ 2 پايىزى قورعانىس مينيسترلىگىمەن كەلىسىمشارتقا وتىرۋى ءتيىس
استانا. KAZINFORM - رەسەي بيلىگى جوعارى وقۋ ورىندارىنا ستۋدەنتتەردى اسكەري كەلىسىمشارتقا تارتۋ بويىنشا مىندەت جۇكتەگەن. بۇل تۋرالى Euronews جازدى.
2026 -جىلدىڭ باسىندا وتكەن جابىق جيىندا رەسەيدىڭ عىلىم جانە جوعارى ءبىلىم ءمينيسترى ۆالەري فالكوۆ ءىرى ۋنيۆەرسيتەتتەردىڭ رەكتورلارىنا ستۋدەنتتەردىڭ كەمىندە %2 ىن قورعانىس مينيسترلىگىمەن كەلىسىمشارتقا وتىرعىزۋ قاجەت ەكەنىن ايتقان.
دەرەككوزدەردىڭ ايتۋىنشا، بۇل تالاپ بارلىق وقۋ ورىندارىنا ورتاق جوسپار رەتىندە ۇسىنىلعان.
تاۋەلسىز رەسەيلىك باق- تىڭ جازۋىنشا، ستۋدەنتتەر اراسىندا اسكەري قىزمەتكە ۇگىت-ناسيحات 2025 -جىلدان باستاپ كۇشەيگەن. قورعانىس مينيسترلىگى جەتەكشى ۋنيۆەرسيتەتتەردىڭ ستۋدەنتتەرىنە تىكەلەي كەلىسىمشارتقا وتىرىپ، درون وپەراتورلارى رەتىندە قىزمەت ەتۋ مۇمكىندىگىن ۇسىنىپ جاتىر. ونىڭ ورنىنا جوعارى مولشەردەگى تولەمدەر، «ۇرىس ايماعىنان الىس جەردە» وقۋ جانە ءبىر جىلدان كەيىن ۋنيۆەرسيتەتكە قايتا ورالۋ مۇمكىندىگى ۋادە ەتىلەدى.
ستۋدەنتتەر نەگىزىنەن بىلتىر قۇرىلعان ۇشقىشسىز جۇيەلەر اسكەرىنە شاقىرىلعان. جالپى، قورعانىس مينيسترلىگى بۇل جاڭا قۇرىلىمعا شامامەن 78,8 مىڭ ادام تارتۋدى جوسپارلاپ وتىر.
رەسمي دەرەكتەرگە سايكەس، وتكەن جىلى رەسەي جوعارى وقۋ ورىندارىندا 2,2 ميلليون ەر ادام ءبىلىم العان. ەگەر %2 جوسپارى ورىندالسا، ارميا قاتارى شامامەن 44 مىڭ جاسپەن تولىقپاق. ال ەگەر بۇل تالاپ كوللەدجدەرگە دە قاتىستى بولسا، جالپى سانى 76 مىڭ ادامعا دەيىن جەتۋى مۇمكىن.
ستۋدەنتتەرگە كەلىسىمشارتتان كەيىن وقۋىن جالعاستىرۋعا مۇمكىندىك بەرىلەتىنى، سونداي-اق ۋكرايناداعى سوعىسقا قاتىسۋشىلارعا بەرىلەتىن مەملەكەتتىك تولەمدەر مەن جەڭىلدىكتەر ۇسىنىلاتىنى ايتىلعان. ءىرى ۋنيۆەرسيتەتتەر، سونىڭ ىشىندە ماسكەۋ مەملەكەتتىك ۋنيۆەرسيتەتى مەن سانكت- پەتەربۋرگ مەملەكەتتىك ۋنيۆەرسيتەتى قوسىمشا قارجىلاي قولداۋ كورسەتۋگە ۋادە بەرگەن.
قازىرگى ۋاقىتتا وقۋ ورىندارىندا اسكەري قىزمەتتى ناسيحاتتاۋ تەك جارنامالىق پلاكاتتارمەن شەكتەلمەي، ستۋدەنتتەر «ماڭىزدى تاقىرىپتار» كەزدەسۋلەرىنە جانە «ەرلىك ساباقتارىنا» شاقىرىلۋدا. «ۆەرستكا» باسىلىمىنىڭ دەرەگىنشە، رەسەي بويىنشا 200 دەن استام وسىنداي ۇگىت شاراسى وتكەن.
قۇقىق قورعاۋشىلار كەلىسىمشارتقا وتىرعان جاستار قاجەتتى تالاپتارعا ساي كەلمەسە نەمەسە درون وپەراتورلىعى بويىنشا جۇمىسقا جىبەرىلمەسە، ولاردى باسقا اسكەري بولىمدەرگە اۋىستىرۋى مۇمكىن ەكەنىن ەسكەرتەدى.
كاسىپورىندارعا دا مىندەت جۇكتەلدى
رەسەيدىڭ ريازان وبلىسىندا بيلىك جۇمىس بەرۋشىلەرگە دە اسكەري كەلىسىمشارتقا ادام تارتۋ مىندەتىن جۇكتەگەن.
Conflict Intelligence Team جاريالاعان قۇجاتقا سايكەس، وبلىس گۋبەرناتورى پاۆەل مالكوۆ كاسىپورىندارعا ناقتى تاپسىرمالار بەرگەن:
150- 300 قىزمەتكەرى بار ۇيىمدار - 2 ادام،
300- 500 قىزمەتكەرى بار ۇيىمدار - 3 ادام،
500 دەن كوپ قىزمەتكەرى بار ۇيىمدار - 5 ادام اسكەري كەلىسىمشارتقا تارتۋى ءتيىس.
بۇل شەشىم رەسەي پرەزيدەنتى ۆلاديمير پۋتيننىڭ 2022 -جىلعى جارلىقتارىنا نەگىزدەلگەن. قۇجاتتا ءوڭىر باسشىلارىنا ارميا قاجەتتىلىكتەرىن قامتاماسىز ەتۋ بويىنشا وكىلەتتىك بەرىلگەن.
سونىمەن قاتار، بۇل تالاپتاردى ورىنداماعان كاسىپورىندارعا قانداي جاۋاپكەرشىلىك قاراستىرىلاتىنى ناقتى ايتىلماعان.
