رەسەي پرەزيدەنتى كاسپي تەڭىزىنىڭ تارتىلۋ ماسەلەسىنە قاتىستى پىكىر ءبىلدىردى
استانا. KAZINFORM - رەسەي پرەزيدەنتى ۆلاديمير پۋتين كاسپي تەڭىزى سۋىنىڭ ازايۋ پروبلەماسىنا قاتىستى پىكىرىن ءبىلدىردى، دەپ حابارلايدى Kazinform ءتىلشىسى.
كاسپيدەگى سۋ دەڭگەيىنىڭ تومەندەۋى تۋرالى سۇراقتى ازەرتاگ اگەنتتىگىنىڭ وكىلى سانكت-پەتەربۋرگ حالىقارالىق ەكونوميكالىق فورۋمى اياسىندا حالىقارالىق اقپارات اگەنتتىكتەرى باسشىلارىمەن كەزدەسۋدە كوتەردى.
- الدىن الا زەرتتەۋلەر سۋ دەڭگەيىنىڭ كۇرت تومەندەۋى جالعاسىپ جاتقانىن كورسەتىپ وتىر. كاسپي تەڭىزىندەگى سۋدىڭ 80 پايىزدان استامى ەدىل وزەنىنەن كەلەتىنىن ەسكەرسەك، بۇل - ەلەۋلى ماسەلە. وسى باعىتتا رەسەي تاراپى قانداي شارالار قابىلداپ جاتىر؟ - دەپ سۇرادى اگەنتتىك وكىلى.
ۆلاديمير پۋتين بۇل ماسەلەنىڭ راسىندا وتە ماڭىزدى ەكەنىن جانە بىرلەسكەن شەشىمدەر قاجەت ەكەنىن اتاپ ءوتتى.
- بۇل ماسەلەنى ازەربايجان پرەزيدەنتى يلحام گەيدار ۇلى اليەۆ كوتەردى. مەن بىردەن نازار اۋداردىم، ويتكەنى بۇل جاعداي ءبىرشاما نازارىمنان تىس قالىپ قويعان ەكەن. ءبىراق ماسەلەنىڭ كولەمى وتە اۋقىمدى، ءتىپتى جاھاندىق سيپاتقا يە دەۋگە بولادى. ءبىز ارال تەڭىزىمەن بولعان قايعىلى جاعدايدى بىلەمىز. سوندىقتان مۇندايدا ۋاقىت وزدىرماي، كەلىسىلگەن شەشىمدەر قابىلداۋ قاجەت، - دەدى رەسەي پرەزيدەنتى.
ونىڭ ايتۋىنشا، رەسەي ۇكىمەتىنە قاجەتتى تاپسىرمالار بەرىلگەن، ال ازەربايجاندىق تاراپپەن بىرلەسكەن جۇمىس جالعاسۋدا.
- مۇندا ەڭ باستىسى - سەكىرمەلى، ناۋقاندىق شارالار ەمەس، تاباندى ءارى جۇيەلى جۇمىس قاجەت. جالپى، تابيعي قۇبىلىستارعا قارسى تۇرۋ مۇمكىن بە، بىلمەيمىن. ەدىل وزەنى اتىرابىنداعى ادام ارەكەتىنەن بولەك، مۇندا جاھاندىق سيپاتتاعى باسقا دا سەبەپتەر بولۋى مۇمكىن. تاريحتا مۇنداي قۇبىلىستار تالاي رەت بولعان: بىردە كاسپي كوتەرىلەدى، بىردە سۋى قايتادان ازايادى. سوندىقتان ناقتى سەبەپتەردى انىقتاپ، قايتىمسىز سالدارعا جول بەرمەۋ ءۇشىن قولدان كەلگەننىڭ ءبارىن جاساۋىمىز قاجەت، - دەپ تۇيىندەدى ۆلاديمير پۋتين.
ايتا كەتەيىك، وسى جيىندا قازاقستان مەن رەسەي اراسىنداعى تاۋار اينالىمىنىڭ %95 عا جۋىعى ۇلتتىق ۆاليۋتالارمەن جۇزەگە اسىرىلاتىنى ايتىلدى.
بۇعان دەيىن ۆلاديمير پۋتين يران مەن يزرايل اراسىنداعى جانجالدى شەشۋدىڭ جولى تۋرالى ايتتى.
سونداي-اق قازاقستانمەن قارىم- قاتىناستى دامىتۋدا ەشقانداي قيىندىق جوق ەكەنىن جەتكىزدى.
