رەسەي ۋنيۆەرسيتەتتەرىنىڭ ءبىرى بالاسى جوقتارعا سالىق سالۋدى ۇسىندى

استانا. قازاقپارات - رەسەي الەۋمەتتىك مەملەكەتتىك ۋنيۆەرسيتەتى بالاسى جوقتارعا سالىناتىن سالىقتىڭ پارامەترلەرىن ازىرلەدى، دەپ حابارلايدى forbes.ru.

رەسەي الەۋمەتتىك مەملەكەتتىك ۋنيۆەرسيتەتىنىڭ ءبىرىنشى پرورەكتورى جومارت اليەۆ بالاسى جوق ەرلەر مەن ايەلدەرگە سالىق سالۋ پارامەترلەرىن ازىرلەگەنىن حابارلادى. بۇل تۋرالى ول «گوۆوريت موسكۆا» راديوستانسياسىنا بەرگەن سۇحباتىندا مالىمدەگەن. اليەۆتىڭ ايتۋىنشا، مۇنداي شارا حالىق سانىنىڭ ءوسۋىن قامتاماسىز ەتۋگە كومەكتەسەدى. سالىق مۇلىك، مۇراگەرلىك جانە تابىس سالىعىمەن بىرگە قوسىمشا ەسەپتەلۋى ءتيىس.

زەرتتەۋىمىز ءبىر جارىم جىل بويى جۇرگىزىلدى، ءبىز جازدا سوڭعى قورىتىندى ەسەپتى جاريالادىق. قازىرگى دەموگرافيالىق جاعدايدى جاقسارتۋعا اسەر ەتە الاتىن ءبىرقاتار شارالار قاراستىرىلدى. بالاسىزدارعا ارنالعان سالىق ءبىز قاراستىرعان 15 شارانىڭ ىشىندە كوش باستاپ تۇر. ءبىزدىڭ مودەلدەۋلەرىمىزگە سايكەس، بۇل حالىقتىڭ 1000 ادامىنا شاققاندا 1,05 ءوسىم بەرەدى. بۇل وتە ۇلكەن كورسەتكىش، - دەدى جومارت اليەۆ.

ونىڭ ايتۋىنشا، بالا كوتەرە المايتىندار بالا اسىراپ الۋدى قاراستىرۋلارى كەرەك.

مۇنداي ۇسىنىستار رەسەيدە بۇرىن دا بىرنەشە رەت كوتەرىلگەن بولاتىن. الەۋمەتتىك جەلىلەردە جانە ءتۇرلى بۇقارالىق اقپارات قۇرالدارىندا تالقىلانعانىنا قاراماستان، بۇرىنعى باستامالار قولداۋ تاپپاعان ەدى.