رەسەي مەن قىتاي كوشباسشىلارى استانادا كەلىسسوز جۇرگىزدى

استانا. KAZINFORM - رەسەي پرەزيدەنتى ۆلاديمير پۋتين قىتاي حالىق رەسپۋبليكاسىنىڭ (ق ح ر) ءتوراعاسى شي جينپيڭمەن كەلىسسوز جۇرگىزدى.

3-شىلدە كۇنى شاڭحاي ىنتىماقتاستىق ۇيىمىنىڭ (ش ى ۇ) سامميتى قارساڭىندا پۋتين ازەربايجان، موڭعوليا، پاكىستان جانە تۇركيا باسشىلارىمەن كەزدەستى. كەشكە ول قازاقستان پرەزيدەنتى قاسىم-جومارت توقايەۆپەن كەزدەسۋ وتكىزىپ، ودان كەيىن سامميتكە قاتىسۋشىلارعا ارنالعان بەيرەسمي تۇسكى اسقا قاتىسادى.

كەزدەسۋ بارىسىندا پۋتين شي جينپيڭدى بريكس سامميتىندە كۇتەتىنىن مالىمدەدى.

«بيىل ءبىز ءسىز بەن ءبىزدىڭ باستامامىزبەن قۇرىلعان بريكس ۇيىمىنا ءتوراعالىق ەتىپ وتىرمىز. قازان ايىندا قازاندا وتەتىن سامميتكە ءسىز دە قاتىسادى دەپ ۇمىتتەنەمىز»، - دەدى رەسەي مەملەكەتىنىڭ باسشىسى استانادا ءوتىپ جاتقان ش ى ۇ سامميتىنىڭ اشىلۋ قارساڭىندا وتكەن كەزدەسۋدە قىتاي باسشىسىنا.

پۋتين رەسەي-قىتاي قارىم-قاتىناسى تاريحتا بۇرىن-سوڭدى بولماعان ەڭ جاقسى كەزەڭدى باستان كەشىرىپ جاتقانىن، ماسكەۋ مەن بەيجىڭ اراسىنداعى ىنتىماقتاستىق ەشكىمگە قارسى ەمەستىگىن اتاپ ءوتتى.

كوشباسشىلار ساۋدا ءوسىمى، تۋريزمدى دامىتۋ، حالىقارالىق ۇيىمدارداعى، سونىڭ ىشىندە ش ى ۇ مەن بريكس اياسىنداعى ىنتىماقتاستىق، سونداي-اق باسقا دا ءبىرقاتار تاقىرىپتى تالقىلادى.

«رەسەي پرەزيدەنتى ۆلاديمير پۋتيننىڭ مامىر ايىنداعى قىتايعا جاساعان ءساتتى ساپارى ەكى ەل اراسىنداعى قارىم-قاتىناستى دامىتۋدىڭ باسىم باعىتىن ايقىنداۋعا كومەكتەستى»، - دەدى رەسەي باسشىسىمەن كەزدەسۋ بارىسىندا قىتاي ءتوراعاسى شي جينپيڭ.

ول ەكى ەل باسشىلارى قول جەتكىزگەن ۋاعدالاستىق قازىر تولىعىمەن ورىندالىپ، «كوپقىرلى ىنتىماقتاستىق جوسپارلانعان باعىت بويىنشا تۇراقتى تۇردە ءجۇرىپ جاتقانىن» اتاپ ءوتتى.