رەسەي مەن ۋكراينا اراسىنداعى كەلىسسوزدەردىڭ ءۇشىنشى كەزەڭى بۇگىن ستامبۇلدا وتەدى
استانا. KAZINFORM - بۇگىن كەشكە ستامبۇلدا رەسەي مەن ۋكراينا دەلەگاتسيالارى اراسىنداعى كەلىسسوزدەردىڭ ءۇشىنشى راۋندى ءوتۋى ءتيىس.
اتاپ ايتقاندا، «ۋكرينفورم» اگەنتتىگىنىڭ حابارلاۋىنشا، كەلىسسوزدەر جەرگىلىكتى ۋاقىتپەن ساعات 19:00 دە «چىراعان» سارايىندا باستالادى. سول كۇن، ۋاقىت پەن ورىندى كەيبىر رەسەيلىك اقپارات اگەنتتىكتەرى دە راستاپ وتىر.
بۇل كەلىسسوز - رەسەي مەن ۋكراينا اراسىنداعى ءۇشىنشى راۋند بولماق. رەسەي دەلەگاتسياسىن پرەزيدەنت كومەكشىسى ۆلاديمير مەدينسكي باسقارادى، ال ۋكراينا تاراپىنان دەلەگاتسيانى ۇلتتىق قاۋىپسىزدىك جانە قورعانىس كەڭەسىنىڭ حاتشىسى، بۇرىنعى قورعانىس ءمينيسترى رۇستەم ۋمەروۆ باستاپ بارادى.
بۇعان دەيىن دە ب ا ق رەسەي مەن ۋكراينا اراسىنداعى جاڭا كەلىسسوزدەردىڭ ورنى مەن ۋاقىتىن حابارلاعان ەدى. اقپاراتتارعا سايكەس، ولار وسى اپتادا ستامبۇلدا وتەدى دەپ جوسپارلانعان.
كەشە كرەمل كەلىسسوزدەردىڭ تاقىرىپتارىن جاريالادى. رەسەي پرەزيدەنتىنىڭ باسپا ءسوز حاتشىسى دميتري پەسكوۆتىڭ ايتۋىنشا، تاراپتار سوعىستى اياقتاۋ شارتتارىنا قاتىستى ەكى مەموراندۋم جوبالارىن جانە باسقا دا كۇردەلى ماسەلەلەردى تالقىلاماق.
سونداي-اق، ۋكراينا پرەزيدەنتى ۆلاديمير زەلەنسكي دە كەلىسسوزدەر تاقىرىبىنا توقتالىپ ءوتتى. ونىڭ ايتۋىنشا، نەگىزگى ماسەلەلەر: تۇتقىنداردى قايتارۋ، رەسەيگە اكەتىلگەن بالالاردى ەلگە جەتكىزۋ جانە ەكى ەل باسشىلارىنىڭ كەزدەسۋىنە دايىندىق.
