ەۆەرەست شىڭىن باعىندىرعان قازاق قىزى ەندى قاي تاۋعا تۋ تىگەدى
استانا. KAZINFORM - ەۆەرەست شىڭىن (8848 م) باعىندىرعان ەكىنشى قازاق ايەلى ءجاميلا باشيروۆا الداعى جوسپارلارىمەن ءبولىستى.
ول اتاقتى شىڭعا شىعۋ وڭايعا سوقپاعانىن ايتادى. سونداي-اق ونىڭ ەڭ ءبىرىنشى ارەكەتى اۋا رايىنا بايلانىستى ءساتسىز اياقتالعان. دەسە دە، ماقساتىنا جەتۋ ءۇشىن ەشتەڭەدەن قايمىقپاعان قايسار ارۋ نەپالدا 1 اپتادان استام ۋاقىت كۇتىپ، ەكىنشى مۇمكىندىگىندە ەۆەرەست شىڭىن باعىندىرا الدى.
«العاشقى ساپارىمىزدا ورتا جولدان قايتقانىمىز ءۇشىن قاتتى جىلادىم. ءار ساپارعا قوماقتى قاراجات قاجەت ەكەنى بەلگىلى. ەۆەرەست شىڭىن باعىندىرۋعا دەگەن نيەتىمدى بايقاعان ارىپتەسىم دەمەۋشىلىك كورسەتۋگە دايىن ەكەنىن جەتكىزدى. ەكى ساپارعا شامامەن 100 مىڭ دوللار قارجى جۇمسالدى. ەندىگى ماقساتىم - مادابلان شىڭىن باعىندىرۋ»، - دەيدى ول.
ءجاميلا مانسابىندا ەۆەرەستتەن بولەك، ەۋروپانىڭ ەڭ بيىك نۇكتەسى ەلبرۋسقا (5642 مەتر)، وڭتۇستىك امەريكانىڭ ەڭ بيىك نۇكتەسى اكونكاگۋاعا (6962 مەتر)، لەنين شىڭىنا (7134 مەتر) شىققان.
44 جاستاعى سەمەي ءوڭىرىنىڭ تۋماسى تاماقتانۋ ءوندىرىسى بويىنشا ينجەنەر-تەحنولوگ ماماندىعىن يگەرگەن. ونىڭ ايتۋىنشا، سوڭعى ءتورت جىلدا تاپقان تابىسىن شىڭعا شىعۋ ءۇشىن جيناپتى.
«مەن وسى قادامعا بارعانىما ءبىر ءسات تە وكىنگەن ەمەسپىن. ءوزىمنىڭ رۋحاني اسەرىم ءۇشىن قوماقتى قارجىنى جۇمساي العانىما كەۋدەمدى عاجايىپ سەزىم كەرنەدى. ءبىر بولمەلى پاتەردە تۇرامىن، بريلليانت نەمەسە برەند اشەكەيلەرىم جوق. استىمدا كولىگىم جوق. كەيىنگى ءتورت جىلدا تاپقان قاراجاتىمدى شىڭداردى باعىندىرۋعا جۇمسادىم»، - دەيدى ءجاميلا.
ەسكە سالساق، بۇعان دەيىن 44 جاستاعى وتانداسىمىز ءجاميلا باشيروۆانىڭ ەۆەرەست شىڭىن باعىندىرعانىن جازعان ەدىك.
اۆتور
ابىلايحان جۇماشيەۆ
