پرەمەر-مينيستر قوقىس تاستايتىن ادامدارعا جازانى قاتاڭداتۋدى تاپسىردى

استانا. KAZINFORM - ۇكىمەت باسشىسى ولجاس بەكتەنوۆ قورشاعان ورتانى لاستاعان ادامدارعا قاتىستى قاتاڭ شارالار قولدانۋدى جۇكتەدى.

- جاز ايلارىندا كوپتەگەن ادام تابيعات اياسىنا دەمالىسقا شىعىپ، قوقىس قالدىرىپ كەتەدى. وسى باعىتتاعى جۇمىستى كۇشەيتۋ كەرەك. ەكولوگيا جانە تابيعي رەسۋرستار مينيسترلىگى، ىشكى ىستەر مينيسترلىگى قورشاعان ورتانى لاستاعان ادامداردى جاۋاپكەرشىلىككە تارتۋعا ءتيىس. ولارعا قاتىستى قاتاڭ شارالار قولدانا وتىرىپ، كەڭ اۋقىمدى ءتۇسىندىرۋ جۇمىسىن جۇرگىزۋ قاجەت، - دەدى ولجاس بەكتەنوۆ ۇكىمەت وتىرىسىندا.

ەكولوگيا جانە تابيعي رەسۋرستار مينيسترلىگىنىڭ مالىمەتىنشە، «تازا قازاقستان» باستاماسىنىڭ اياسىندا 2024 -جىلى كەشەندى شارالار قابىلداندى. ناتيجەسىندە 2019-2023 -جىلدارى ورتا ەسەپپەن 62 ەكولوگيالىق اكسيا وتكىزىلسە، 2024 -جىلى بۇل كورسەتكىش 183 كە جەتتى. ەگەر وتكەن 5 جىلدا اكسيالارعا 2,4 ميلليون ادام قاتىسىپ، 900 مىڭ توننا قوقىس جينالىپ، شامامەن 2,5 ميلليون جاسىل جەلەك وتىرعىزىلسا، 2024 -جىلى ەكولوگيالىق اكسيالارعا 6,2 ميلليون ادام قاتىسىپ، 1,1 ميلليون توننا قوقىس جينالدى، شامامەن 1,6 ميلليون اعاش ەگىلدى.