ەرمەك مارجىقپايەۆ: ەلدەگى سپورت نىساندارىنىڭ 20 پايىزى تالاپقا ساي ەمەس

ەلىمىزدە سپورت نىساندارى تاپشى اۋىلداردىڭ ءتىزىمى جاسالادى، دەپ حابارلايدى Kazinform.

تۋريزم جانە سپورت ءمينيسترى ەرمەك مارجىقپايەۆ ورتالىق كوممۋنيكاتسيالار قىزمەتىندە وتكەن بريفينگىدە وسىنداي مالىمەت ايتتى.

«ەلىمىزدىڭ بارلىق سپورتتىق ينفراقۇرىلىمىنا اۋقىمدى تۇگەندەۋ جۇرگىزىلدى. ونىڭ قورىتىندىسى بويىنشا وڭىرلەردە جۇمىس ىستەپ تۇرعان نىسانداردىڭ ورتا ەسەپپەن %20 تالاپقا ساي ەمەستىگى انىقتالدى. وسىلايشا، سپورت ينفراقۇرىلىمىنا، اتاپ ايتقاندا اۋىلدى ەلدى مەكەندەردە اسا مۇقتاج وڭىرلەردىڭ تىزبەسى ايقىندالادى. كەلەسى جىلدان باستاپ «مودۋلدىك ۇلگىدەگى تەز سالىناتىن از شىعىندى 100 سپورت نىسان» جوباسى ىسكە قوسۋ جوسپارلانىپ وتىر»، - دەدى ۆەدومستۆو باسشىسى.

ونىڭ ايتۋىنشا، الداعى ەكى جىلدا 113 جاڭا سپورت نىسانى سالىنۋ كەرەك.

«مەملەكەتتىك-جەكەشەلىك ارىپتەستىك تەتىگىن قولدانا وتىرىپ قولدانىستاعى 26 نىسان قايتا جاڭارتىلادى. الماتى وبلىسىندا وليمپيادالىق دايىندىق بازاسىنىڭ قۇرىلىسى اياقتالىپ كەلەدى. بازا ءبىر ۋاقىتتا 2300 سپورتشىعا 23 وليمپيادالىق سپورت تۇرىمەن اينالىسۋعا مۇمكىندىك بەرەدى. بۇل نىسان جىل بويى جۇمىس ىستەيدى. ۇلتتىق قۇرامالار مەن وبلىستىق كوماندالار ماڭىزدى جارىستار الدىندا تولىققاندى وقۋ-جاتتىعۋ جيىندارىن وتكىزە الادى.

استانادا ۇلتتىق سپورت ۋنيۆەرسيتەتى سالىنىپ جاتىر. نىساندى 2025-جىلى قولدانىسقا بەرۋ جوسپارلانعان»، - دەدى مينيستر.