گەرمانيادا وتەتىن جازعى ۋنيۆەرسيادادا ەل نامىسىن 76 سپورتشى قورعايدى

استانا. قازاقپارات - 16-27-شىلدە ارالىعىندا گەرمانيانىڭ رەين-رۋر ايماعىندا وتەتىن ХХХІІ دۇنيەجۇزىلىك جازعى ۋنيۆەرسيادادا ەل نامىسىن 12 سپورت تۇرىنەن 76 سپورتشى قورعايدى. بۇعان قوسىمشا ۇلتتىق قۇرامانىڭ ساپىندا 18 جاتتىقتىرۋشى مەن 6 رەسمي وكىل بار.

عىلىم جانە جوعارى ءبىلىم مينيسترلىگى مالىمەتىنشە، جازعى ۋنيۆەرسيادا دۋيسبۋرگ، بوحۋم، ەسسەن، حاگەن، ميۋلحايم قالالارى مەن گەرمانيا استاناسى بەرليندە وتەدى.

بۇل - حالىقارالىق ۋنيۆەرسيتەتتىك سپورت فەدەراتسياسىنىڭ (FISU) باستاماسىمەن ۇيىمداستىرىلاتىن ءىرى حالىقارالىق جارىس.

بايراقتى باسەكەدە 8500 دەن اسا سپورتشى سپورتتىڭ 18 تۇرىنەن 234 جۇلدە جيىنتىعىن ساراپقا سالادى. ولاردىڭ ىشىندە جەڭىل اتلەتيكا، ءجۇزۋ، ەسكەك ەسۋ، قىلىشتاسۋ، گيمناستيكا، جەبە اتۋ، تاەكۆوندو جانە وزگە دە سپورت تۇرلەرى بار.

قازاقستان ستۋدەنتتىك ۋنيۆەرسياداعا 1993-جىلدان بەرى تۇراقتى تۇردە قاتىسىپ كەلەدى. وسى ۋاقىت ىشىندە وتاندىق سپورتشىلار بىرنەشە مارتە جۇلدەگەرلەر قاتارىنان كورىنىپ، جوعارى ناتيجە كورسەتىپ ءجۇر.

ايتا كەتەيىك، 2023-جىلى قىتايدىڭ چەندۋ قالاسىندا وتكەن جازعى ۋنيۆەرسيادا دا قازاقستان قۇراماسى 2 التىن، 7 كۇمىس، 11 قولا مەدال جەڭىپ الدى. ەڭ جوعارى ناتيجە 2013-جىلى قازان قالاسىندا وتكەن ۋنيۆەرسيادادا تىركەلدى. مۇندا سپورتشىلار 30 مەدال ەنشىلەگەن بولاتىن.

ايتا كەتەيىك، قازاقستان سپورتشىلارى قىسقى ۋنيۆەرسيادانى 14 مەدالمەن اياقتادى.