ەۋرازيا ۇلتتىق ۋنيۆەرسيتەتىنىڭ عالىمدارى ChatGPT-تىڭ قازاق تىلىندەگى پروتوتيپىن جاسادى
استانا. KAZINFORM - ل. ن. گۋميلەۆ اتىنداعى ە ۇ ۋ جاساندى ينتەللەكت ع ز ي عالىمدارى ChatGPT چات-بوتىنىڭ قازاق تىلىندەگى وتاندىق انالوگىن جاساپ شىعاردى.
ە ۇ ۋ عالىمدارى مەملەكەتتىك تىلدەگى جاساندى ينتەللەكت جۇيەسىن 5 ايدىڭ ىشىندە ازىرلەدى. ChatGPT چات-بوتىنىڭ قازاقستاندىق ۇلگىسى ۇلكەن كولەمدەگى دەرەكتەردى تالداي الادى، سۇراقتارعا جاۋاپ بەرەدى، ماتىندەر قۇرا الادى، سونىمەن قاتار قازاق ءتىلىنىڭ بارلىق مورفولوگيالىق جانە سينتاكسيستىك ەرەجەلەرىن بىلەدى.
«ءبىز قازاق تىلىندە ءبىرىنشى ءىرى LLM ءتىل ۇلگىسىن جاسادىق. جۇيە نەيروندىق جەلى ارحيتەكتۋراسى نەگىزىندە قازاق تىلىندەگى كەز كەلگەن ءماتىندى تۇسىنۋگە جانە ءوز بىلىمىنە سايكەس جاۋاپ بەرۋگە قابىلەتتى. ءبىزدىڭ ChatGPT پروتوتيپىمىز قازاق ءتىلىنىڭ ەرەجەلەرىن تۇسىنەدى، ارىپتەر مەن بۋىندار، سوزدەر مەن سويلەمدەر اراسىنداعى بارلىق تىزبەكتەردى ەستە ساقتايدى، سونىمەن قاتار سينتاكسيستىك جانە گرامماتيكالىق تۇرعىدان دۇرىس ءارى پايدالانۋشىنىڭ سۇرانىسىنا سايكەس كەلەتىن دارەجەدە جاۋاپ بەرە الادى»، - دەپ اتاپ ءوتتى ل. ن. گۋميلەۆ اتىنداعى ە ۇ ۋ «جاساندى ينتەللەكت» عىلىمي-زەرتتەۋ ينستيتۋتىنىڭ ديرەكتورى الىبەك بارلىبايەۆ.
عالىمدار جۇيەنىڭ قازاق ادەبي شىعارمالارىن، نورماتيۆتىك قۇجاتتامالار مەن عىلىمي ماتەريالداردى دايىنداۋ بويىنشا تاجىريبەلەر جۇرگىزىپ كوردى. ولار جاساندى ينتەللەكت مودەلىن ءبىلىم بەرۋ ۇردىسىندە قولدانۋدى ۇسىنباق. چات-بوتتىڭ ءبىلىمىن قاجەتتى اقپاراتتى ناقتىلاۋ ءۇشىن پايدالانۋعا بولادى.
«مەكتەپ وقۋشىلارى ەمتيحانعا دايىندالۋ كەزىندە تەستتەگى كەيبىر اقپاراتتى، ماسەلەن، ماتەماتيكا تەڭدەۋى نەمەسە حيمياداعى تەرميندى تۇسىنبەدى دەلىك. وزدەرى ناقتىلاعىسى كەلەدى، ءبىراق ولاردىڭ قاسىندا ءمۇعالىم بولمايدى. سونداي كەزدە بالالار جۇيەگە سۇراق قويىپ، وتە تەز جانە قىسقا جاۋاپ الادى. سودان كەيىن ولار قوسىمشا سۇراقتار قويا الادى. بۇل تەحنولوگيانى جالپى ءبىلىم بەرەتىن كۋرستاردى ءجيى وقيتىن باستاپقى كۋرستاردىڭ ستۋدەنتتەرى ءۇشىن دە پايدالانۋعا بولادى»، - دەپ اتاپ ءوتتى PhD دوكتورى الىبەك بارلىبايەۆ.
بۇگىندە IT سالاسىنداعى عالىمدار مەن ماماندار جوبانىڭ تەحنيكالىق جانە سەرۆەرلىك مۇمكىندىكتەرىن نىعايتىپ، ودان ءارى دامىتۋدى جوسپارلاپ وتىر.
