ەر ادامنىڭ قانداي اعىمدا ەكەنىن قالاي بىلۋگە بولادى؟
استانا. KAZINFORM - كەزدەسىپ جۇرگەن ەر ادامنىڭ ءدىنى ءداستۇرلى يسلام دا ما، الدە جات ءدىني اعىمدا ما ەكەنىن قالاي بىلۋگە بولادى؟
ق م د ب «شاريعات جانە ءپاتۋا» ءبولىمىنىڭ مامانى ەلبەك تاسبولات ۇلى «جاۋابى بار» باعدارلاماسىندا ناماز وقيتىن ادامعا تۇرمىسقا شىققىسى كەلەتىن قىز-كەلىنشەكتەرگە كەڭەس بەردى، - دەپ حابارلايدى Massaget.kz ءتىلشىسى.
«وكىنىشكە قاراي، جات اعىم وكىلدەرى «مەن حانافيمىن» دەپ ءوزىمىزدىڭ ءداستۇرلى يسلامدى ۇستاناتىن قىزداردى نەكەسىنە الىپ، الداپ جاتقان كورىنەدى. مۇنداي ءبىراز جاعدايلار كەزدەستى. سوندىقتان قارىنداستارىمىزعا ايتاتىنىم، جىگىتتى جاقسىلاپ تانۋ كەرەك، سۇراستىرۋ كەرەك. حانافيمىن دەپ وتىرىك ايتىپ، ونىڭ جات اعىمنان بولىپ شىعۋى ابدەن مۇمكىن. حانافيمىن دەگەن سوزىنە سەنىپ قالماۋ كەرەك. ونىڭ سەنىمىن سۇراۋ كەرەك. سەنىمدە، اقيدادا، تاۋحيدتا قانداي ءمازحابتى ۇستاناسىڭ؟ «مەن قۇران سۇننەتپەن جۇرەم» دەپ قانا قويا سالسا، ونىڭ جاۋابى كۇماندى. ول ناقتى ايتۋ كەرەك: ول اشعاري نە ماتۋريدي دەپ ايتۋى كەرەك. بۇلار ءبىزدىڭ اتا-بابالارىمىز ۇستانىپ كەلگەن سەنىم مەكتەپتەرى»، - دەيدى «شاريعات جانە ءپاتۋا» ءبولىمىنىڭ مامانى.
ەلبەك تاسبولات ۇلى جات اعىمداعى ادامدى كورسەتەتىن بىرنەشە بەلگىنى اتادى.
«ودان بولەك ادامنىڭ جات اعىمدا ەكەنىن شولاق بالاقپەن، ۇزىن ساقالمەن بىلىنەدى دەپ تە ايتىلىپ جاتىر. بۇل ءارقاشان ەمەس، ءبىراق كوبىنەسە شىنىمەن دە سولاي بولادى. سوسىن ونىڭ ناماز وقۋ ۇلگىلەرى حانافي ءمازحابىنا ساي بولمايدى. مىسالى، قايتا-قايتا قول كوتەرۋى مۇمكىن. نامازدان كەيىن قۇران وقىعاندا تۇرىپ كەتۋى مۇمكىن، بەت سيپاماۋى مۇمكىن. وسىنداي بەلگىلەرى بار. ونى ادام ءوزى اجىراتا الماسا، يمامعا كەلىپ، ماسەلەنى سۇراپ العانى ءجون بولادى. اسىرەسە تۇرمىسقا شىعىپ جاتقان كەزدە وتە ساق بولۋ كەرەك. بۇعان نەمقۇرايلى قاراماۋ كەرەك. قازىر ناماز وقىعاننىڭ ءبارى بىردەي ەمەس. سونى ءتۇسىنۋ كەرەك»، - دەپ ەسكەرتتى مامان.
