قىزىلوردادا وقۋشىنى جەزوكشەلىككە ماجبۇرلەۋگە قاتىستى 13 ادام انىقتالدى

استانا. KAZINFORM – ق ر ىشكى ىستەر ءمينيسترىنىڭ ورىنباسارى يگور لەپەحا قىزىلوردادا 16 جاسار وقۋشىنى جەزوكشەلىككە ماجبۇرلەۋ تۋرالى قىلمىستىق ىسكە قاتىستى جاڭا دەرەكتەردى جاريالادى.

«وسى بويىنشا 13 ادام انىقتالدى، ونىڭ ىشىندە 11 ءى قاماۋعا الىندى، ەكەۋى ءۇي قاماقتا وتىر. قازىرگى كەزدە ءبىرقاتار باپ بويىنشا قىلمىستىق ىستەر قوزعالدى. 13 ادامنىڭ اراسىندا قىزدى ماجبۇرلەگەندەر دە، ۇيىمداستىرعاندار دا بار. بۇل ءىس بويىنشا باسقا دەرەكتەردى جاريالاي المايمىن، سەبەبى ونىڭ ءمان- جايى تەرگەۋشىلەردىڭ قۇزىرەتىندە»، - دەدى ي. لەپەحا سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، وقۋشى قىزعا قاتىستى زاڭسىز ارەكەت جاساعانداردىڭ بارلىعى تەكسەرىلىپ جاتىر.

وسىعان دەيىن تامىز ايىنىڭ سوڭىندا قىزىلوردادا وقۋشىنى جەزوكشەلىككە ماجبۇرلەگەن 8 كۇدىكتى قامالعانى حابارلانعان ەدى.

ەسكە سالساق، بيىل تامىز ايىندا قىزىلوردا قالاسىندا مەكتەپ وقۋشىلارى «سىنىپتاسىن سەكس- قۇلدىقتا ۇستادى» دەگەن كۇدىككە ءىلىندى.

ءبىر توپ جاسءوسپىرىم 16 جاسار قىزدى قيناپ ۇستاعانى، ەسىرتكى بەرىپ، جەزوكشەلىكپەن اينالىسۋعا ماجبۇرلەگەنى تۋرالى اقپارات تارادى.

وقۋشى قىزدىڭ اتا- اناسى جاعدايدى قوعامدىق قورعا حابارلاعان.

قىزىلوردا پوليتسياسى اتالعان دەرەك بويىنشا كۇدىكتىلەردى ۇستاپ، ۋاقىتشا ۇستاۋ يزولياتورىنا قامادى. كەيىن كۇدىككە ىلىنگەن مەكتەپ وقۋشىلارى ءۇي قاماققا اۋىستىرىلدى.

وقيعاعا بايلانىستى №7 مەكتەپ- ليتسەي ديرەكتورى، تاربيە ءىسى جونىندەگى ورىنباسارى، پسيحولوگى، الەۋمەتتىك پەداگوگى، سىنىپ جەتەكشىلەرى جۇمىستان بوساتىلدى.