قىزىلوردادا جولدا قالىپ قويعان 1000عا تارتا جولاۋشىعا كومەك كورسەتىلدى

قىزىلوردا. KAZINFORM - قىزىلوردا وبلىسىندا اۋا رايىنىڭ قولايسىزدىعىنان جولدا قالىپ قويعان 807 اۆتوكولىكتەگى 1000 عا تارتا جولاۋشىعا كومەك كورسەتىلدى.

اقتوبە وبلىسىنىڭ اۋماعىندا قاتتى بوران بولىپ تۇر. وسىعان بايلانىستى رەسپۋبليكالىق ماڭىزى بار «سامارا- شىمكەنت» تاس جولىنىڭ 1240-1357 شاقىرىمى ارالىعى جابىلعان. بۇل اقتوبە وبلىسىنىڭ شەكاراسىنان ارال قالاسىنا دەيىنگى ارالىقتى قامتيدى.

«وسىعان وراي جول پاترۋلدىك پوليتسيانىڭ 6 ينسپەكتورى 3 اۆتوكولىكپەن ارال قالاسىنان 20 شاقىرىم قاشىقتىقتا كۇرە جول بويىندا ۋاقىتپەن ساناسپاي جۇمىس جاساپ جاتىر. سول اۋماقتا اقتوبە وبلىسىنا باعىت العان بارلىعى 807 اۆتوموبيل بار. (ولاردىڭ 584 ى جۇك، 13 ى  جولاۋشىلار، 210 ى جەڭىل كولىك. بۇل كولىكتەردە 1000 عا تارت جولاۋشى بار ەكەنى انىقتالدى»، - دەپ ءمالىم ەتتى ارال اۋدانى اكىمدىگىنەن.

جولدىڭ جابىق بولۋىنا بايلانىستى اۋدان اكىمدىگى جانىنان ارنايى شتاب قۇرىلدى. جەرگىلىكتى ەرىكتى جاستار، مەكەمەلەر جانە كاسىپكەرلەر، ءبىلىم سالاسى قىزمەتكەرلەرى تاراپىنان جولاۋشىلارعا تەگىن ىستىق تاماق ۇيىمداستىرىلۋدا.

«ايەلدەر مەن بالالار اۋدان ورتالىعىنداعى ارال يندۋستريالدى- تەحنيكالىق كوللەدجىنىڭ جاتاقحاناسىنا ورنالاستىرىلدى. ەكى مەزگىل مەديتسينا قىزمەتكەرلەرى جولاۋشىلاردى ارالاپ دەنساۋلىعىنا بايلانىستى زەردەلەۋ جۇمىستارىن جۇرگىزۋدە. جولاۋشىلارعا ارنالعان جول بويى قىزمەت كورسەتۋ كەشەندەرىندەگى ازىق- تۇلىك پەن تاماق باعاسى جەرگىلىكتى اكىمدىكتىڭ ۇدايى باقىلاۋىندا»، - دەپ تولىقتىردى اۋدان اكىمدىگى.

ەسكە سالساق، بۇدان بۇرىن بۇرقاسىن، كوكتايعاق بولۋىنا بايلانىستى قىزىلوردا وبلىسىندا كولىك قوزعالىسى شەكتەلدى.