قىزىلوردادا اتا-ەنەسىنىڭ اتىنان نەسيە العان ايەل سوتتالدى

قىزىلوردا. KAZINFORM - قىزىلوردادا كۇيەۋىنىڭ اتا-اناسىنىڭ اتىنان الاياقتىق جولمەن نەسيە العان كەلىنشەككە قاتىستى سوت ۇكىمى شىقتى.

«قىزىلوردا قالاسىنىڭ №2-سوتىندا قازاقستان رەسپۋبليكاسىنىڭ قىلمىستىق كودەكسىنىڭ 190-بابىنىڭ 3-بولىگىنىڭ 1)، 4) - تارماقتارىمەن سوتتالۋشى ە. -گە قاتىستى قىلمىستىق ءىس قارالدى. سوتتالۋشى ە. ۇيالى تەلەفونىنداعى موبيلدى قوسىمشاسى ارقىلى قايىن اتاسى مەن ەنەسىنىڭ اقپاراتتىق جۇيەدەن بەيحابار ەكەنىن، قارتتىق جاسىن پايدالانىپ، بەينەكامەراعا ءتۇسىرۋ ارقىلى ەسەپشوتتارىنا زاڭسىز كىرىپ، ۇيالى تەلەفونىنداعى «Halyk bank» موبيلدى قوسىمشاسى ارقىلى قايىن اتاسى ج. -نىڭ اتىنان 4626167 تەڭگە، ەنەسى ك. -نىڭ اتىنان «Kaspi. kz» موبيلدى قوسىمشاسى ارقىلى زاڭسىز كىرىپ، 2190000 تەڭگە مۇلىكتىك نەسيەلەر راسىمدەپ، ونى اقشاعا اينالدىرىپ، باس پايداسىنا جاراتقان»، - دەلىنگەن وبلىستىق سوت حابارلاماسىندا.

ناتيجەسىندە، جابىرلەنۋشىلەر ج. -عا 4626167 تەڭگە، ك. -گە 2190000 تەڭگە مۇلىكتىك شىعىن كەلتىرگەن.

سوتتالۋشىنىڭ قىلمىستىق ارەكەتى ءوزىنىڭ كىناسىن مويىنداعان جاۋابىمەن، جابىرلەنۋشىلەردىڭ جاۋاپتارىمەن، بانكتىك انىقتامالارمەن، اۋدارىم تۇبىرتەكتەرىمەن جانە ءىس بويىنشا باسقا دا قۇجاتتارمەن دالەلدەنگەن. سوتتالۋشى ە. مەن جابىرلەنۋشىلەر ج. جانە ك. اراسىندا كىنانى مويىنداۋ تۋرالى مامىلە نىسانىنداعى پروتسەستىك كەلىسىم جاسالعان.

باستى سوت تالقىلاۋىندا جابىرلەنۋشى ج. سوتتالۋشى ە. -دەن 4626167 تەڭگە زالالدى ءوندىرۋدى سۇراعان، ال جابىرلەنۋشى ك. تالاپ قويۋدان باس تارتقان.

سوت ۇكىمىمەن سوتتالۋشى ە. قازاقستان رەسپۋبليكاسىنىڭ ق ك-نىڭ 190-بابى 3-بولىگى 1)، 4) - تارماقتارىمەن كىنالى دەپ تانىلىپ، 3  جىل 6 اي مەرزىمگە باس بوستاندىعىن شەكتەۋ جازاسى تاعايىندالىپ، پروباتسيالىق باقىلاۋ بەلگىلەنگەن.

ازاماتتىق جاۋاپكەر ە. -دەن ازاماتتىق تالاپكەر ج. -نىڭ پايداسىنا 4626167 تەڭگە وندىرىلگەن.