قىزىلوردادا 15 جاستاعى قىزعا ۇيلەنگەن 21 جاستاعى جىگىت 12 جىلعا سوتتالىپ كەتتى
قىزىلوردا. KAZINFORM - قىزىلوردا وبلىسىندا 15 جاستاعى قىزعا ۇيلەنگەن 21 جاستاعى جىگىت 12 جىلعا سوتتالىپ كەتتى.

بۇل وقيعا جايىندا الەۋمەتتىك جەلى بەتتەرىندە جاريالاندى. وندا ەكەۋىنىڭ اتا-انالارىنىڭ رۇقساتىمەن ۇيلەنگەنى ايتىلعان. كەيىننەن 15 جاستاعى قىز جۇكتىلىگىنە بايلانىستى دارىگەرگە كورىنگەن. ەمحاناداعى ماماندار بۇل جايىندا پوليتسەيلەرگە جەتكىزگەن.
سول وقيعادان كەيىن جاس جىگىتتىڭ ۇستىنەن قىلمىستىق ءىس قوزعالىپ، وعان 12 جىلعا باس بوستاندىعىنان ايىرۋ جازاسى تاعايىندالعان.
اتالعان سوت ۇكىمىنە بايلانىستى قىزىلوردا وبلىستىق سوتى Kazinform اقپارات اگەنتتىگىنە تۇسىنىكتەمە بەردى.
- قىزىلوردا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ 2024-جىلعى 25-قاراشاداعى ۇكىمىمەن جابىق سوت وتىرىسىندا سوتتالۋشى ق ر قىلمىستىق كودەكسىنىڭ 122-بابىنىڭ 3-بولىگى 1) - تارماعىمەن (كورىنەۋ ون التى جاسقا تولماعان اداممەن جىنىستىق قاتىناس نەمەسە سەكسۋالدىق سيپاتتاعى وزگە دە ارەكەتتەردى جاساۋ) كىنالى دەپ تانىلدى.
سوتتالۋشى پەداگوگيكالىق لاۋازىمداردى جانە كامەلەتكە تولماعاندارمەن جۇمىس ىستەۋگە بايلانىستى لاۋازىمداردى اتقارۋ قۇقىعىنان ءومىر بويىنا شەتتەتىلىپ، 12 جىلعا باس بوستاندىعىنان ايىرۋعا سوتتالعان. سوت ۇكىمىنە 2024-جىلعى 17-جەلتوقساندا اپەللياتسيالىق شاعىمدار تۇسكەن.
قىزىلوردا وبلىستىق سوتىنىڭ قىلمىستىق ىستەر جونىندەگى سوت القاسىنىڭ 2025-جىلعى 14-قاڭتارداعى قاۋلىسىمەن ءبىرىنشى ساتى سوتىنىڭ ۇكىمى وزگەرىسسىز، اپەللياتسيالىق شاعىمدار قاناعاتتاندىرۋسىز قالدىرىلدى، - دەپ ءمالىم ەتتى قىزىلوردا وبلىستىق سوتىنان.
ەسكە سالساق، بۇدان بۇرىن قىزىلوردا وبلىسىندا بيۋجەت قاراجاتىن ءوز ماقساتىنا پايدالانعان باس ەسەپشى سوتتالدى.