قىزىلوردا وبلىسىندا نارتاي بەكەجانوۆتىڭ سىرنايى تابىلدى

 قىزىلوردا. KAZINFORM - قىزىلوردا وبلىسىندا بەلگىلى ونەر مايتالمانى نارتاي بەكەجانوۆتىڭ سىرنايى تابىلدى.

نارتاي بەكەجانوۆ 1890-جىلى قىزىلوردا وبلىسى شيەلى اۋدانىندا دۇنيەگە كەلگەن.

1954-جىلى الماتى قالاسىندا ومىردەن وتكەن.

اقىن حالىق اندەرىن شەبەر ورىنداۋمەن قاتار ءوزى دە اندەر («تولقىن»، «نارتاي سازى»، «وسيەت تەرمە») شىعاردى.

جەرگىلىكتى وڭىردە ونەر مەن مادەنيەتتى دامىتۋ جولىندا اۋقىمدى ەڭبەك اتقاردى.

قۇندى جادىگەر شيەلى اۋدانى «توڭكەرىس» اۋىلىنىڭ تۇرعىنى بەگايىم سەيىتجانوۆانىڭ ساندىعىندا ساقتالعان.

اۋىل تۇرعىنى ىلەسبەك قاريانىڭ ايتۋىنشا، اناسى بەگايىم انگە بەيىم، سوزگە شەشەن بولعان.

1943 -جىلى 6-7-سىنىپ وقىپ جۇرگەن كەزىندە الماتىدان روزا باعلانوۆا كەلىپ، كونسەرت قويادى. سول كەشتە مەكتەپ وقۋشىلارى دا ءان ايتىپتى.

جاس تالانتتىڭ دارا داۋىسىن ەرەكشە باعالاعان ءانشى وعان وزىمەن بىرگە الىپ كەتۋگە ۇسىنىس جاسايدى. ءبىراق، قارت اكەسى جالعىز قىزىن جىبەرمەپتى.

«انامىز نارتاي بەكەجانوۆتىڭ قارىنداسى بولىپ كەلەدى. بالا كۇنىمىزدە ۇيدە ءبىر اسپاپ تۇراتىن. ونى اق ماتامەن وراپ، ساندىعىنا سالىپ قوياتىن. سودان نەشە جىلداي ساقتاۋلى جاتتى. نارتاي بۇل سىرنايىمەن 1936 -جىلى ماسكەۋدەگى قازاق ادەبيەتى مەن ونەرىنىڭ ونكۇندىگىندە ءان ايتقان. بۇعان 1990 -جىلى «جازۋشى» باسپاسىنان جارىق كورگەن «امانات» كىتابىنداعى سۋرەت دالەل»، - دەيدى ىلەسبەك اعامىز.

قازىر قۇندى جادىگەر نارتاي ءان مەكتەبىنىڭ جارقىن وكىلى داۋلەتحان ءىزباسقانعا تابىستالعان.