قىزىلوردا وبلىسىندا بيىل 357 ادامدى كەنە شاعۋ جاعدايى تىركەلدى
قىزىلوردا. KAZINFORM - قىزىلوردا وبلىسىندا بيىل 357 ادامدى كەنە شاعۋ جاعدايى تىركەلدى.
كونگو- قىرىم گەمورراگيالىق قىزباسىنا 5 ادام تەكسەرۋدەن ءوتىپ، 2 ەۋى زەرتحانالىق، كلينيكالىق جانە ەپيدەميولوگيالىق جولمەن ناقتىلاندى.
قىزىلوردا وبلىسىندا كونگو- قىرىم گەمورراگيالىق قىزباسى بويىنشا قولايسىز دەپ تانىلعان 115 ەلدى مەكەندە كەنەگە قارسى زالالسىزداندىرۋ جۇمىستارى جالعاسىپ جاتىر. ولاردىڭ تيىمدىلىگىن تەكسەرۋ ماسەلەسى تۇراقتى باقىلاۋدا.
«بيىلعى جىلدىڭ ناۋرىز ايىنان باستاپ زووپارازيتولوگيالىق توپپەن كەنە جيناۋ، زەرتتەۋ جۇمىستارى جۇرگىزىلىپ وتىر. بۇگىنگە دەيىن 17579 كەنە جينالىپ، 2083 سىناما زەرتتەۋمەن قامتىلدى. ونىڭ 34 نەن وڭ ناتيجە انىقتالدى. جىل باسىنان بەرى 357 ادام كەنە شاعۋ جاعدايىمەن مەديتسينالىق كومەككە جۇگىنگەن. ولاردىڭ بارلىعى 14 كۇن مەديتسينالىق باقىلاۋعا الىنىپ، كومەك كورسەتىلدى. كونگو-قىرىم گەمورراگيالىق قىزباسى بويىنشا 5 ادام تەكسەرىلدى. جاڭاقورعان مەن شيەلى اۋداندارىندا 2 ناۋقاس زەرتحانالىق، كلينيكالىق جانە ەپيدەميولوگيالىق جولدارمەن ناقتىلاندى»، - دەدى قىزىلوردا وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتى باسشىسى دينارا جاڭابەرگەنوۆا.
كۇننىڭ جىلىنۋىنا بايلانىستى كەنەلەردىڭ تابيعاتقا شىعۋى بەلسەندى بولا باستايدى. دالالىق ايماقتا جۇمىس جاسايتىن، مال جانە ەگىن شارۋاشىلىعىمەن اينالىساتىن ادامدار ءۇشىن كەنە شاعىپ، اۋرۋ جۇقتىرىپ الۋ قاۋپى ارتا تۇسەدى.
«بۇل رەتتە ساقتىق شارالارىنىڭ قاتاڭ ورىندالۋى اسا ماڭىزدى. وبلىس تۇرعىندارىن مال جانە اۋىل شارۋاشىلىعىمەن اينالىسقاندا ارنايى جۇمىس كيىمىمەن، قولعاپپەن جۇمىس جاساۋدى سۇرايمىز. وعان قوسا تابيعات اياسىنا دەمالىسقا شىققاندا مەيلىنشە دەنەنىڭ بارلىق جەرىن جاۋىپ تۇراتىن، اق ءتۇستى كيىم كيىپ، كەنەلەردىڭ بار-جوقتىعىنا 1-2 ساعات سايىن تەكسەرىپ تۇرعان دۇرىس. سونداي- اق اۋرۋ بەلگىسى انىقتالعان بويدا جەدەل مەديتسينالىق كومەككە جۇگىنۋگە كەڭەس بەرەمىز»، - دەپ تولىقتىردى دەپارتامەنتى باسشىسى.
