قىزىلوردا وبلىسىندا 102 جاستاعى مايدانگەر اۋدان اكىمى سايلاۋىندا تاڭداۋ جاسادى

قىزىلوردا وبلىسىندا 102 جاستاعى سىرداريالىق مايدانگەر ياحيا تاسىروۆ پيلوتتىق نەگىزدە العاش رەت ءوتىپ جاتقان اۋدان اكىمى سايلاۋىندا تاڭداۋ جاسادى، دەپ حابارلايدى Kazinform.

سىر وڭىرىندە سىرداريا جانە شيەلى اۋداندارى اكىمىنىڭ سايلاۋى وتۋدە.

وعان 102 جاستاعى سىرداريالىق مايدانگەر ياحيا تاسىروۆ العاشقىلار قاتارىندا كەلىپ، ءوز تاڭداۋىن جاسادى.

«تۋعان جەرىنە قىزمەت ەتەتىن ازاماتتى تاڭداۋ - ماڭىزدى ءسات. بىرلىكتى تۋ ەتىپ، اۋداننىڭ دامۋىنا نەگىز بولاتىن ساياسي ناۋقانعا ءاربىر ازامات بەي- جاي قاراماۋ قاجەت»، - دەدى قارت مايدانگەر.

قازىنالى قاريا ءوز تاڭداۋىن جاساعاننان كەيىن اق باتاسىن بەرىپ، ساتتىلىك تىلەدى.

ايتا كەتسەك، سىرداريادا 22101، شيەلىدە 50402 سايلاۋشى تىركەلگەن.

سايلاۋ كوميسسيالارىنىڭ مالىمەتى بويىنشا، 2 اۋداندا 1011 ازامات العاش رەت داۋىس بەرۋگە قاتىسادى. ونىڭ 694 ى شيەلى، 317 ءى سىرداريا اۋدانىندا تۇرادى. سونداي- اق پيلوتتىق سايلاۋ وتەتىن اۋدانداردا 5-قاراشا كۇنى 18 جاسقا تولاتىن 5 ازامات بار.

داۋىس بەرۋ جەرگىلىكتى ۋاقىت تاڭعى ساعات 07.00 دەن باستالىپ، كەشكى 20.00 گە دەيىن جالعاسادى.