قىتايلىق ويىنشىق ءوندىرۋشى Labubu-دىڭ نارىقتاعى قۇنى «گازپرومنان» اسىپ ءتۇستى
استانا. KAZINFORM - قىتايلىق تانىمال Labubu ويىنشىعىن وندىرەتىن Pop Mart كومپانياسىنىڭ نارىقتىق قۇنى رەسەيلىك گاز الىبى «گازپرومنىڭ» كاپيتاليزاتسياسىنان اسىپ ءتۇستى، دەپ جازدى Kazinform اگەنتتىگىنىڭ ءتىلشىسى «بيزنەس Online» باسىلىمىنا سىلتەمە جاساپ.
باسىلىم مالىمەتىنشە، 2025 -جىلدىڭ 22-شىلدەسىندەگى جاعداي بويىنشا، كوللەكتسيالىق ويىنشىقتار ساتۋمەن اينالىساتىن قىتايلىق ريتەيلەردىڭ اكتسيالارىنىڭ جالپى قۇنى 42 ميلليارد دوللاردى قۇرادى. ال رەسەيلىك ەنەرگەتيكالىق كومپانيانىڭ نارىقتىق باعاسى 38,77 ميلليارد دوللار دەپ باعالانىپ وتىر. وسىلايشا، Pop Mart الەمدىك رەيتينگتە «گازپرومدى» 49-ورىنعا ارتتا قالدىردى.
Labubu كومپانياسى - 2015-جىلى گونكونگ سۋرەتشىسى لۋن كاسين جاساعان ەلفكە ۇقسايتىن جاراتىلىس. بۇل كىشكەنتاي، ۇلپىلدەك مونسترلار ەرەكشە بەلگىلەرىمەن تانىمال: كوزدەرى ۇلكەن، قۇلاقتارى ۇشكىر جانە توعىز ءتىسى بار. ويىنشىقتىڭ تانىمالدىعى وتكەن جىلدىڭ سوڭىندا كۇرت ءوستى - ايەلدەر ويىنشىقتى سومكەسىنە اكسەسسۋار رەتىندە تاعىپ شىعۋى الەۋمەتتىك جەلىلەردە قىزۋ تالقىلانعان بولاتىن.
بۇعان دەيىن ۇلى بريتانيادا Labubu قۋىرشاقتارىنىڭ ساتىلىمى ۋاقىتشا توقتاتىلعانى حابارلانعان ەدى. بۇل رەكوردتىق سۇرانىس اياسىندا قىزمەتكەرلەر مەن ساتىپ الۋشىلاردىڭ قاۋىپسىزدىگىنە بايلانىستى جاسالدى.
ەسكە سالا كەتەيىك، ماۋسىم ايىندا كەرىسىنشە قوعامدا ۇلكەن قىزىعۋشىلىق تۋدىرعان بۇل برەندتىڭ اينالاسىنداعى جاعداي كۇرت وزگەرىپ، وعان قاتىستى اكسيالار باعاسى كۇرت قۇلدىراعانىن جازعان ەدىك.
