قىتايلىق سومكەمەن تاسىدى: پەريزات قايرات قور قارجىسىن قالاي قولما-قول اقشاعا اۋىستىردى
استانا. KAZINFORM - استانادا قايىرىمدىلىق قوردىڭ بۇرىنعى جەتەكشىسى، ۆولونتەر پەريزات قايرات پەن ونىڭ اناسى عايني الاشبايەۆاعا قاتىستى سوت وتىرىسىندا كۋاگەرلەردەن جاۋاپ الۋ پروتسەسى جالعاسىپ جاتىر.
كۋاگەر ءادىلحان مۋسيننىڭ مالىمدەۋىنشە، ول سوتتالۋشى پەريزات قايراتپەن بىرنەشە رەت كەزدەسىپ، قور قارجىسىن جەكە كاسىپكەرلىكتەردىڭ شوتى ارقىلى قولما-قول اقشاعا اۋدارعان.
- قانشا رەت بولعانى، ناقتى ەسىمدە جوق، ويتكەنى كەزدەسۋ ءساۋىر-مامىر ايلارىندا ءوتتى. ءبىراق كەيىن اقشانى مەن تاپسىردىم، شاتاسپاسام، ءۇش كەزدەسۋ بولعان سياقتى. ءدال بارلىق سومانى اتاي المايمىن، شامامەن، ءبىر جەكە كاسىپكەر ورتا ەسەپپەن 70 ميلليون تەڭگە العان. ۇمىتپاسام، 12-13 جەكە كاسىپكەر بولدى. مەنىڭ تۇسىنۋىمشە، ەگەر جەكە كاسىپكەر بەلگىلى ءبىر سوماعا شارت جاساسسا، ول بۇل سومانى ءبىر رەتتىك اۋدارىممەن الا العان. ال ەگەر شارتتا قانداي دا ءبىر ەسكەرتۋ بولسا، ول كەزدە ەكى ترانشپەن جىبەرە العان. ءبىراق تۇسىنگەنىم جەكە كاسىپكەرلەردىڭ كوبىسى اقشانى ءبىر رەتتىك اۋدارىممەن العان، - دەدى ءادىلحان مۋسين سوتتا.
ونىڭ ايتۋىنشا، قولما-قول اقشانى كۇدىكتى پەريزات قايراتتىڭ ءوزى الىپ جۇرگەن.
- اقشانى پەريزاتتىڭ ءوزى الىپ ءجۇردى. ىڭعايلى بولۋ ءۇشىن ءبىز اقشانى سومكەلەرگە سالاتىنبىز. سەبەبى بانك بىزگە اقشانى بۋىلعان كۇيىندە بەرەتىن. ولاردى سومكەگە سالعان ىڭعايلىراق ەدى. بۇل سومكەلەر كەيىن وزىنە جەكە تابىستالىپ، كولىككە جۇكتەلەتىن، - دەيدى ول.
وسى ورايدا پروكۋرور كۋاگەردەن اقشانىڭ قانداي سومكەمەن تاسىعانىن ناقتىلادى.
- كادىمگى قىتايلىق تور سومكەلەرى، - دەپ قىسقا قايىردى ءا. مۋسين.
سونداي-اق كۋاگەر شامامەن 210 ميلليون تەڭگە قولما-قول اقشاعا اينالعانىن ايتتى.
بەلگىلى بولعانداي، تاسقىن كەزىندە نازاربايەۆ زياتكەرلىك مەكتەبىنىڭ قىزمەتكەرلەرى 2,9 ميلليون تەڭگە جولداعان.
ءىستى قاراۋ كەزىندە پەريزات قايرات جەتەكشىلىك ەتكەن قورعا قارجى اۋدارعان 47 ادام جابىرلەنۋشى دەپ تانىلدى.
بۇعان دەيىن كۇدىكتى پەريزات قايرات باسقارعان قايىرىمدىلىق قورىنا نازاربايەۆ مەكتەبىنىنىڭ اتا-انالارى شامامەن 1 ميلليون تەڭگە جيناپ بەرگەنى تۋرالى جازعان بولاتىنبىز.
ودان بولەك پەريزات قايرات جەتەكشىلىك ەتكەن قورعا تاعى ءبىر قۇرىلىس كومپانياسى قورعا 200 ميلليون تەڭگە اۋدارعان.
كەشە وتكەن سوت وتىرىسىندا Forte Bank ماركەتينگ ديرەكتورى انتون كيم تاسقىن كەزىندە پەريزات قايراتتىڭ قورىنا جەكە شوتىنان جارتى ميلليون تەڭگە اۋدارعانىن ايتقان ەدى.
سوت وتىرىسىندا بەلگىلى بولعانداي، پەريزات قايرات اناسىن ورتاعا سالىپ، 23 ميلليون تەڭگەگە گۇل بيزنەسىن ساتىپ العان.
سونىمەن قاتار «اسار ۇمە» قورىنىڭ پرەزيدەنتى اسحات نۇرماشيەۆ كۇدىكتى پەريزات قايراتقا 200 ميلليون تەڭگە اۋدارعانىن ايتتى.
