قىتايلىق روبوتتار برازيلياداعى ناۋقاسقا قاشىقتان جوعارى دالدىكتەگى وتا جاسادى

كارلوس ەدۋاردو دومەنەنىڭ ايتۋىنشا، قۇرىلعى اسا جوعارى ايقىندىقتاعى بەينە مەن بايلانىس كەزىندە كىدىرىستىڭ مۇلدە بولماۋىن قامتاماسىز ەتكەن.

اتالعان وتا ناۋرىز ايىندا سىچۋان ۋنيۆەرسيتەتىنىڭ باتىس قىتاي اۋرۋحاناسى جانىنداعى حالىقارالىق قاشىقتان روبوتتاندىرىلعان حيرۋرگيا ورتالىعىندا ءساتتى جاسالعان جەتى وپەراتسيانىڭ قاتارىنا ەندى.

باۋىر ترانسپلانتاتسياسى بويىنشا ساراپشى جانە اۋرۋحانانىڭ ۆيتسە-پرەزيدەنتى ۋ حۋن ءساتتى ورىندالعان وپەراتسيالاردىڭ ىشىندە گەپاتوبيليارلىق جۇيەگە، ياعني باۋىر، ءوت قابى جانە ءوت جولدارىنا، سونداي-اق ۇيقىبەزگە جاسالعان وتالاردىڭ ەرەكشە ورىن الاتىنىن اتاپ ءوتتى.

چىڭدۋداعى ورتالىق 21-ناۋرىزدا اشىلعان. ول اقىلدى حيرۋرگيانىڭ جاھاندىق پلاتفورماسى رەتىندە قۇرىلىپ، پاتسيەنتتەر ءىرى مەديتسينالىق ورتالىقتارعا بارۋعا ءماجبۇر بولاتىن جۇيەدەن جوعارى تەحنولوگيالىق كومەكتى جەرگىلىكتى جەردە كورسەتۋ مودەلىنە كوشۋگە باعىتتالعان.

ۋ حۋڭنىڭ سوزىنشە، مۇنداي جۇيە ادامداردىڭ قارجىلىق جانە ۋاقىت شىعىنىن 80 پايىزعا دەيىن قىسقارتادى.

- قىتايدىڭ وزىق مەديتسينالىق تەحنولوگيالارى مەن جابدىقتارى ەندى «ءبىر بەلدەۋ، ءبىر جول» باستاماسى اياسىندا برازيليادا ەنگىزىلىپ جاتىر. بۇل وڭتۇستىك امەريكا بويىنشا كوپتەگەن ناۋقاسقا پايداسىن تيگىزۋدە، - دەدى دومەنە.

ايتا كەتەيىك، ول سونداي-اق برازيليا روبوتوتەحنيكا قاۋىمداستىعىنىڭ پرەزيدەنتى.

اۋرۋحانا 2026 -جىلدىڭ شىلدە ايىندا مىسىردا حيرۋرگيالىق روبوتتاردى قاشىقتان باسقارۋ ورتالىعىن اشۋدى جوسپارلاپ وتىر. بۇل تەحنولوگيانى ەلدە ەنگىزۋگە جانە جەرگىلىكتى دارىگەرلەردىڭ وسى سالاداعى بىلىكتىلىگىن ارتتىرۋعا كومەكتەسەدى.

قىتاي مەديتسينالىق تەحنولوگيالارىنىڭ شەتەلدە كەڭ كولەمدە ەنگىزىلىپ جاتقانى ەكسپورت ستاتيستيكاسىمەن دە راستالادى.

قىتاي مەديتسينالىق جابدىق وندىرۋشىلەرى قاۋىمداستىعىنىڭ مالىمەتىنە سۇيەنسەك، وتكەن جىلى قىتايدان ەكسپورتتالعان مەديتسينالىق جابدىق كولەمى 45,8 ميلليارد ا ق ش دوللارىنا جەتكەن. بۇل 2019 -جىلعى كورسەتكىشتەن 62,4 پايىزعا جوعارى.

ەسكە سالا كەتسەك، روبوتوتەحنيكا بويىنشا الەم چەمپيوناتىنىڭ جۇلدەگەرى ءاليحان سەرىكوۆ Stanford ۋنيۆەرسيتەتىنىڭ گرانتىن يەلەندى.