قىتايلىق اجە ونلاين ساۋداعا تاۋەلدى بولىپ، ەكى ءۇيدى زاتقا تولتىرىپ تاستاعان

66 جاستاعى ۆاڭ ەسىمدى قىتاي ازاماتى ونلاين-دۇكەندەرگە 2 ميلليون يۋان (شامامەن 280000 ا ق ش دوللارى) جۇمساپ، ساتىپ العان تاۋارلارىن قويۋ ءۇشىن ەكى پاتەر مەن جەراستى گاراجىن پايدالانۋعا ءماجبۇر بولدى. ءبىر قىزىعى - ايەلدىڭ بۇل زاتتاردى اشىپ كورۋگە دە زاۋقى جوق: باستىسى - ساتىپ السا، بولدى.

ۆاڭ شاڭحايداعى جيادين اۋدانىنىڭ شەتىندە تۇرادى جانە جالعىز ءومىر سۇرەدى. سوڭعى بىرنەشە جىل ىشىندە ول نەگىزىنەن باد، كوسمەتيكا، سۋسابىن مەن التىن اشەكەيلەر ساتىپ العان. كوبى - تىكەلەي ەفيرلەر ارقىلى ۇسىنىلعان تاۋارلار. قوراپتار بولمەنىڭ توبەسىنە دەيىن جينالعان، ال ايەل ۇيىقتايتىن جەر تاپپاي، سوڭىندا ەكىنشى پاتەر جالداۋعا ءماجبۇر بولعان.

اقشامدى وسىلاي جۇمسايمىن، سوندا تۋىستارىم قارىزعا اقشا سۇرامايدى. ۇيگە كەلىپ، اينالانى كورسە - اقشا سۇراۋعا ىڭعايسىزدانادى، - دەيدى ۆاڭ.

تۇرعىندار بۇل جاعدايعا نارازىلىق بىلدىرۋدە: كورشىلەرى جاعىمسىز ءيىس پەن جاندىكتەرگە شاعىمدانعان. 2024 -جىلدىڭ مامىرىندا جەرگىلىكتى كوميتەت ۆاننىڭ رۇقساتىمەن ءۇيدى تازالاپ بەرگەن، ءبىراق كوپ ۇزاماي باياعى قالپىنا تۇسكەن.

پسيحياترلار مۇنداي شوپينگكە تاۋەلدىلىك كوبىنەسە دەپرەسسيا مەن الەۋمەتتىك وقشاۋلانۋدىڭ سالدارى ەكەنىن ايتادى. شانحايلىق دارىگەر شي يانفەن بۇل جاعدايدى «زات جيناۋ سيندرومى» دەپ اتاپ، ونى ەمدەۋ ۇزاق مەرزىمدى جانە جۇيەلى تەراپيانى قاجەت ەتەتىنىن جەتكىزدى.

ونلاين قولدانۋشىلاردىڭ ءبىرى: «ماسەلە - جالعىزدىقتا. جاستار ءوز اتا-اناسىنا كوبىرەك كوڭىل ءبولۋى كەرەك»، - دەپ پىكىر قالدىرعان.

قازىرگى تاڭدا ۆاڭنىڭ شەتەلدە تۇراتىن قىزى مەن سيرەك كەلەتىن تۋىستارى ونىڭ بۇل ارەكەتىن توقتاتۋعا ەش شارا قولدانا الماي وتىر.