قىتايدىڭ ورتالىق ازيا ەلدەرىمەن تاۋار اينالىمىنىڭ جارتىسى قازاقستانعا تيەسىلى
الماتى. KAZINFORM - الماتىدا سىرتقى ىستەر مينيسترلەرىنىڭ «ورتالىق ازيا - قىتاي» فورماتىنداعى VI كەزدەسۋى باستالدى.
رەسمي ءبولىم باستالماس بۇرىن دەلەگاتسيا باسشىلارىن - ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ قۇتتىقتادى.
ودان كەيىن قاتىسۋشىلار وڭىرلىك جانە حالىقارالىق ىنتىماقتاستىقتىڭ وزەكتى ماسەلەلەرىن تالقىلاۋعا كوشتى.
قازاقستان ديپلوماتياسىنىڭ باسشىسى ءوز سوزىندە نەگىزگى ينۆەستيتسيالىق سەرىكتەس قىتايمەن تولىق اۋقىمدى ىنتىماقتاستىق قازاقستان ءۇشىن دە، ورتالىق ازيا ەلدەرى ءۇشىن دە باستى باسىمدىق بولىپ قالا بەرەتىنىن اتاپ ءوتتى.
- قىتاي - ءبىزدىڭ ستراتەگيالىق ارىپتەسىمىز، ونىمەن ءوزارا ءىس-قيمىل ۋاقىت سىنىنان وتكەن جانە سىرتقى جاعدايلارعا باعىنبايتىن ءوزارا سەنىمنىڭ بەرىك نەگىزىنە قۇرىلعان. ورتالىق ازيا مەملەكەتتەرىنىڭ الەۋەتىن ق ح ر-دىڭ وراسان زور مۇمكىندىكتەرىمەن بىرىكتىرۋ تەڭدەسى جوق وڭىرلىك ارەنادا ءوزارا مۇددەلەر مەن بەرىك سەرىكتەستىكتىڭ قالىپتاسۋىنا جول اشادى، - دەپ اتاپ ءوتتى مۇرات نۇرتىلەۋ.
ول ىنتىماقتاستىق تاريحىنداعى ماڭىزدى وقيعا 2023 -جىلى سيان قالاسىندا وتكەن ورتالىق ازيا- قىتاي ءبىرىنشى سامميتى بولعانىن، وندا ەلدەر باسشىلارى ساۋدا، كولىك، لوگيستيكا، ءبىلىم، عىلىم جانە باسقا دا سالالارداعى ىنتىماقتاستىقتى دامىتۋدىڭ ناقتى ۆەكتورىن انىقتاعانىن ەسكە سالدى.
تەك 2024 -جىلدىڭ وزىندە ورتالىق ازيا ەلدەرى مەن قىتاي اراسىنداعى تاۋار اينالىمى رەكوردتىق 95 ميلليارد دوللارعا جەتتى، ونىڭ 46 پايىزى قازاقستانعا تيەسىلى.
- استانا وڭ ديناميكاسىن ساقتاۋعا، ءوزارا سەنىمدى نىعايتۋعا جانە سيان قۇرۋعا جانە جاڭا تابىستارعا جەتۋگە نيەتتى، - دەپ اتاپ ءوتتى مينيستر.
قازاقستان وسى جازدا استانادا وتەتىن «ورتالىق ازيا - قىتاي» فورماتىنداعى ەكىنشى ءسامميتتى وتكىزۋگە ەرەكشە ءمان بەرەدى.
مۇرات نۇرتىلەۋ ەلىمىزدە بۇل فورماتتىڭ ايماقتىق ءوزارا ءىس-قيمىل تەتىكتەرى اراسىندا فلاگمان بولۋى ءۇشىن بارلىق جاعداي جاسالىپ جاتقانىن جەتكىزدى.
وسىعان دەيىن ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ جانە ق ك پ وك ساياسي بيۋروسىنىڭ مۇشەسى، قىتاي حالىق رەسپۋبليكاسىنىڭ سىرتقى ىستەر ءمينيسترى ۋاڭ ي قازاقستان مەن قىتاي اراسىنداعى ستراتەگيالىق ديالوگتىڭ ەكىنشى وتىرىسىنا قاتىسقان بولاتىن.
