قىتايداعى كوپكۇندىك جارىس: استانالىق ۆەلوشاباندوز جالپى ەسەپتە كوش باستادى
استانا. قازاقپارات - XDS Astana Team شاباندوزى حەنوك مۋلۋبىرحان قىتايدا ءوتىپ جاتقان چينحاي كولىندەگى Tour of Cinghai Lake جارىسىنىڭ جەتىنشى كەزەڭىندە ءۇشىنشى ورىن الىپ، جالپى كلاسسيفيكاتسيادا جاڭا كوشباسشى اتاندى، دەپ حابارلايدى Kazinform ءتىلشىسى.
كوپكۇندىك ۆەلوجارىستىڭ جەتىنشى كەزەڭى گونگحەدە باستالىپ، حايان قالاسىندا اياقتالدى، قاشىقتىق 137 شاقىرىمدى قۇرادى. قازاقستان قۇراماسىنىڭ ەريترەيالىق لەگيونەرى ءۇشىنشى، ال ونىڭ ارىپتەسى، 34 جاستاعى جاڭا زەلانديالىق اارون گەيت ءتورتىنشى ورىنعا تابان تىرەدى.
- ءبىز ءۇشىن ءساتتى ءارى قيىن كۇن بولدى. كوماندا ماعان سەنىم ارتتى. سوندىقتان مەن ءوزىمدى جاقسى سەزىندىم جانە فينالعا دايىندالدىم. قورىتىندىلاي كەلە، ءبىز كەزەڭ بويىنشا ءۇشىنشى ورىن الدىق، سونىمەن قاتار جالپى ەسەپتە كوش باسىنا شىقتىق. ەندى ازداپ دەمالىپ، ەرتەڭگى شەشۋشى كەزەڭگە باسا نازار اۋدارۋ كەرەك، - دەدى حەنوك مۋليۋبىرحان XDS Astana Team كومانداسىنىڭ باسپا ءسوز قىزمەتىنە.
