قىتايداعى بايقاۋدا ديماشپەن بىرگە ءان سالعان ۇمىتكەر فينالعا وتپەي قالدى
استانا. KAZINFORM - قازاقستاندىق ءانشى ديماش قۇدايبەرگەن اراعا 7 جىل سالىپ «Singer 2024» ءان بايقاۋىنىڭ ساحناسىنا ورالدى.
بايقاۋ شارتىنا سايكەس، ديماش جوبانىڭ اقتىق باسەكەسىندە امەريكالىق تانىمال ءانشى شانتە توررەين مۋرمەن بىرگە ونەر كورسەتىپ، Lose Control ءانىن شىرقادى.
وكىنىشكە قاراي، شانتە مۋر فينالدىق باسەكەنىڭ ەكىنشى كەزەڭىنە وتپەي قالدى.
ال ءادىلقازى شەشىمى قىتايلىق الەۋمەتتىك جەلىدە جانكۇيەرلەردىڭ نارازىلىعىنا ۇشىرادى.
سونداي-اق، ولار جەڭىمپازدى تەلەكورەرمەندەردىڭ داۋىس بەرۋى ارقىلى تاڭداۋ كەرەك دەگەن پىكىر ايتىپ جاتىر.
Weibo الەۋمەتتىك جەلىسى قولدانۋشىلارىنىڭ ايتۋىنشا، «الەمگە تانىمال قوس ءانشىنىڭ ونەرى - كەشتىڭ ەڭ جارقىن ءساتى بولدى، ال شانتە مۋردىڭ كەلەسى كەزەڭگە وتپەۋى تىپتەن اقىلعا سىيمايدى».
ايتا كەتەيىك، شانتە توررەين مۋر - امەريكالىق ءانشى، اكتريسا جانە تەلەجۇرگىزۋشى.
شانتە مۋردىڭ دەبيۋتتىك ستۋديالىق «Precious» البومى 1992-جىلى جارىققا شىعىپ، امەريكانىڭ دىبىس جازۋ ونەركاسىبى قاۋىمداستىعىنىڭ (RIAA) التىن سەرتيفيكاتىنا يە بولعان.
ول سونداي-اق ەكى رەت گرەمميگە ۇمىتكەر رەتىندە ۇسىنىلدى.
بۇعان دەيىن حابارلاعانىمىزداي، قازاقستاندىق ءانشى رۋحيا بايدۇكەن قىتايداعى «Singer 2024» بايقاۋىنىڭ 8-كەزەڭىندە ونەر كورسەتىپ، كەلەسى كەزەڭگە وتە الماعان بولاتىن.
ەسكە سالايىق، ديماش قۇدايبەرگەن «Singer 2017» بايقاۋىندا ەكىنشى ورىن يەلەنگەن ەدى.
اۆتور
مۇحتار قاليموللا ۇلى
