قىتايدا سيفرلىق يۋانعا ارنالعان حالىقارالىق وپەراتسيالىق ورتالىق قۇرىلادى
استانا. KAZINFORM - قىتايدا سيفرلىق يۋانعا ارنالعان حالىقارالىق وپەراتسيالىق ورتالىق قۇرىلادى. بۇل تۋرالى سارسەنبى كۇنى شاڭحايداعى لۋتسزياتسزۋي فورۋمىندا قىتاي حالىق بانكىنىڭ ءتوراعاسى پان گۋنشەن مالىمدەدى، دەپ جازادى شينحۋا.
ونىڭ ايتۋىنشا، بۇل ورتالىقتىڭ ماقساتى - سيفرلىق يۋاندى ينتەرناتسيونالداندىرۋعا، قارجى نارىعىنداعى قىزمەتتەردى دامىتۋعا جانە سيفرلىق قارجى سالاسىنداعى يننوۆاتسيالاردى قولداۋعا ىقپال ەتۋ.
ورتالىقتىڭ اشىلۋى - شاڭحايدا قابىلداناتىن سەگىز باستامانىڭ ءبىرى ەكەنى ايتىلدى.
پان گۋنشەننىڭ مالىمدەۋىنشە، قالادا سونىمەن قاتار بانكارالىق نارىقتاعى مامىلەلەر تۋرالى ەسەپتەردى جينايتىن جانە ءارتۇرلى قوسالقى نارىقتارداعى (وبليگاتسيالار، ۆاليۋتالار، دەريۆاتيۆتەر) بەلسەندىلىكتى تالدايتىن ارنايى ەسەپ رەپوزيتوريى قۇرىلادى. بۇل ماكروەكونوميكالىق ساياساتتى ازىرلەۋ مەن قارجى نارىقتارىنا باقىلاۋ جاساۋدى جاقسارتۋعا مۇمكىندىك بەرەدى.
شاڭحايدا جەكە تۇلعالاردىڭ نەسيە تاريحى جونىندەگى اگەنتتىك تە قۇرىلادى. ول قارجى مەكەمەلەرىنە ءارتۇرلى جانە جەكەلەندىرىلگەن نەسيە ونىمدەرىن ۇسىنۋعا مۇمكىندىك بەرەدى. بۇل ەلدەگى الەۋمەتتىك نەسيە جۇيەسىن جەتىلدىرۋگە ىقپال ەتپەك.
سونداي-اق، شاڭحايدىڭ ەركىن ساۋدا ايماعى - لينگاندا وففشورلىق ساۋدانى دامىتۋ ماقساتىندا قارجى قىزمەتتەرىن كەشەندى رەفورمالاۋعا باعىتتالعان پيلوتتىق باعدارلاما ىسكە قوسىلادى. باعدارلاما شەڭبەرىندە بيزنەس جۇرگىزۋگە ارنالعان يننوۆاتسيالىق ەرەجەلەر ەنگىزىلمەك.
قالعان شارالارعا ەركىن ساۋداعا ارنالعان وففشورلىق وبليگاتسيالاردى ازىرلەۋ، كاسىپورىندارعا ارنالعان قارجىلاندىرۋ ارنالارىنىڭ كەڭەيۋىن قامتاماسىز ەتۋ، ترانسشەكارالىق ساۋدا مەن ينۆەستيتسيانى جەڭىلدەتۋ ماقساتىندا ساۋدا شوتتارىنىڭ جۇيەسىن وڭتايلاندىرۋ كىرەدى.
