قىتايدا قىرىققۇلاقتىڭ جاڭا ءتۇرى انىقتالدى

  استانا. KAZINFORM - قىتايلىق زەرتتەۋشىلەر وڭتۇستىك قىتايدا قىرىققۇلاقتىڭ جاڭا ءتۇرىن انىقتاپ، ونى Cyrtomium adenotrichum دەپ اتادى، دەپ حابارلايدى شينحۋا اقپارات اگەنتتىگى.

گۋاڭشي قىتايلىق مەديتسينا جانە فارماتسيەۆتيكا ينستيتۋتىنىڭ مالىمەتىنشە، زەرتتەۋشىلەر گۋاڭشي- سچۋان اۆتونوميالىق اۋدانى (GCAR، وڭتۇستىك قىتاي) حەچي قالاسىنداعى ناندان ۋەزىندەگى جارتاستاردىڭ بىرىنەن جاڭا تۇردەگى 10 عا جۋىق جابايى وسىمدىكتى انىقتادى.

جاقىندا PhytoKeys بوتانيكالىق كلاسسيفيكاتسياسىنىڭ حالىقارالىق جۋرنالىندا جاريالانعان زەرتتەۋ ناتيجەلەرى Cyrtomium adenotrichum ۋساسىر (Dryopteridaceae) تۇقىمداسىنىڭ تسيرتوميۋم (Cyrtomium) تۇقىمىنا جاتاتىنىن كورسەتتى. تابىلعان وسىمدىكتىڭ بيىكتىگى 5 تەن 15 س م- گە دەيىن جەتەدى.

«قىرىققۇلاقتىڭ بۇل تۇرىنە ءتان بەلگىلەردىڭ ءبىرى - جاپىراعىنىڭ نەگىزگى تامىرىنداعى بەزدى تۇكتەردىڭ از بولۋى. بۇل بىرەگەي قۇرىلىم ونى تسيرتوميۋم تۇقىمداس وسىمدىكتەردىڭ باسقا تۇرلەرىنەن ەرەكشەلەندىرەدى»، - دەپ اتاپ ءوتتى عالىمدار.

قىرىققۇلاقتىڭ وسى جاڭا ءتۇرىنىڭ سيرەك كەزدەسەتىندىگىن، از پوپۋلياتسياسىن جانە تىرشىلىك ەتۋ ورتاسىنىڭ نازىكتىگىن نەگىزگە الا وتىرىپ، زەرتتەۋشىلەر ونى حالىقارالىق تابيعاتتى قورعاۋ وداعىنىڭ جويىلىپ كەتۋ قاۋپى تونگەن تۇرلەردىڭ قىزىل تىزىمىنە ەنگىزىلگەن كريتەريلەر بويىنشا جويىلىپ كەتۋ قاۋپى تونگەن تۇرلەر قاتارىنا جاتقىزدى.

زەرتتەۋشىلەردىڭ ايتۋىنشا، الداعى ۋاقىتتا بۇل ءتۇردىڭ بيولوگيالىق، ەكولوگيالىق جانە ەمدىك قۇندىلىعى جونىندە زەرتتەۋلەر جۇرگىزىلەتىن بولادى.