قىتايدا ەنەرگيا جۇيەسىنە تۇسەتىن جۇكتەمە اپتاپ ىستىق سالدارىنان رەكورد جاڭارتتى
استانا. KAZINFORM - قىتايدىڭ كەڭ اۋماعىن شارپىعان اپتاپ ىستىق ەلەكتر ەنەرگياسىنا دەگەن سۇرانىستىڭ بۇرىن-سوڭدى بولماعان وسۋىنە الىپ كەلدى. ءبىرقاتار ايماقتا اۋا تەمپەراتۋراسى 40 گرادۋس سەلسيگە دەيىن جەتتى، دەپ حابارلايدى Reuters.
بيىل العاش رەت قىتايدا تاۋلىكتىك ەنەرگيا جۇكتەمەسى 1,5 ميلليارد ك ۆ ت- تان استى. ق ح ر ۇلتتىق ەنەرگەتيكا باسقارماسىنىڭ مالىمەتىنشە، بۇل شىلدە ايىنداعى تۇتىنۋدىڭ ءۇشىنشى رەكوردتىق كورسەتكىشى. جاڭا شەكتەۋ وتكەن جىلعى كورسەتكىشتەن 55 ميلليون ك ۆ ت- قا ارتىق بولدى.
قىتايدىڭ ۇلتتىق مەتەوقىزمەتى حابارلاعانداي، سوڭعى كۇندەرى ەلدىڭ سولتۇستىك-باتىس جانە وڭتۇستىك-باتىسىنداعى سەگىز مەتەوستانتسيادا سۋبتروپيكالىق انتيتسيكلون اسەرىنەن ابسوليۋتتى تەمپەراتۋرالىق رەكوردتار تىركەلگەن. جاز باستالعالى بەرى ق ح ر پروۆينتسيالارىندا 36 رەت ايماقتىق تەمپەراتۋرالىق شەكتەر بۇزىلعان.
ەكسترەمالدى اۋا رايى جاعدايلارى ەنەرگيا جۇيەسىنە تۇسەتىن جۇكتەمەنىڭ نەگىزگى فاكتورى بولىپ وتىر. ىستىق چۋنتسيننەن تەڭىز جاعالاۋىنداعى گۋانجوۋعا دەيىنگى اۋماقتى قامتىپ، 200 ميلليوننان استام حالقى بار وڭىرلەرگە اسەر ەتتى.
- قازىرگى تاڭدا ەنەرگيا جۇيەسى جۇكتەمەگە توتەپ بەرىپ وتىر. الايدا ناقتى سىناق كەزەڭى ءالى الدا، ەلەكتر قۋاتىن شەكتەۋ قاۋپى ساقتالىپ تۇر، - دەدى ەنەرگەتيكا جانە كليماتتىڭ وزگەرۋى جونىندەگى Economist Intelligence Unit اعا ساراپشىسى چيم لي.
اپتاپ تەك ەگىندى كۇيدىرىپ، اۋىل شارۋاشىلىعى وندىرۋشىلەرىنىڭ تابىسىن ازايتىپ قانا قويماي، ونەركاسىپ ورتالىقتارى مەن پورتتاردىڭ جۇمىسىن باياۋلاتىپ، دەنساۋلىق ساقتاۋ جۇيەسىنە دە اۋىرتپالىق ءتۇسىرۋى مۇمكىن.
سونىمەن قاتار، اپتاپ ىستىق تۇتىنۋشىلىق سۇرانىستىڭ وسۋىنە دە سەبەپ بولىپ وتىر. قىتايلىق ينتەرنەت-گيگانت JD.com مالىمەتىنشە، شىلدە ايىندا اۋا باپتاعىشتار مەن قول جەلدەتكىشتەرىنىڭ ساتىلىمى وتكەن ايمەن سالىستىرعاندا تيىسىنشە %112 جانە %103 عا ارتقان. تاماق تانۋ ورىندارىنا دا سۇرانىس وسكەن، سەبەبى تۇرعىندار ىستىقتان قورعانۋ جولدارىن ىزدەۋدە.
ايتا كەتەلىك يسپانيادا اپتاپ ىستىق سوڭعى ەكى ايدا 1180 ادامنىڭ ءومىرىن جالمادى.
