قىتايدا شەنەۋنىكتەر جۇمىسشىلارعا سەگىز توننا قوقىستان ساعات ىزدەتتى
قىتايدىڭ شانشي پروۆينساسىنداعى داتۋن قالاسىندا شەنەۋنىكتەر بالالارعا ارنالعان اقىلدى ساعاتتى تابۋ ءۇشىن جۇمىسشىلارعا سەگىز توننا قوقىستى قولمەن اقتارتقانى تۋرالى وقيعا ۇلكەن داۋ تۋعىزدى، - دەپ حابارلايدى South China Morning Post باسىلىمى.
وقيعا شىلدە ايىنىڭ باسىندا بولعان. بالاعىمەن بىرگە داتۋن قالاسىنا كەلگەن تۋريست ايەل ۇيىنە قايتقان سوڭ بالاسىنىڭ اقىلدى ساعاتى جوعالعانىن بايقايدى. GPS-ترەكەر ارقىلى قۇرىلعىنىڭ قالدىقتاردى ورتەۋ زاۋىتىندا جاتقانىن انىقتايدى.
ايەل جەدەل جەلىگە قوڭىراۋ شالىپ، شەنەۋنىكتەر ۆوكزالدان شىققان قوقىستى تۇگەلدەي قايتا قاراۋعا تاپسىرما بەرەدى. ونىڭ ايتۋىنشا، ساعات سول جەردە جوعالۋى مۇمكىن بولعان.
قىتايلىق ب ا ق مالىمەتىنشە، ەكى جۇمىسشى شامامەن سەگىز توننا قوقىستى بىرنەشە ساعات بويى قولمەن اقتارىپ، اپتاپ ىستىقتا ىزدەۋ جۇرگىزگەن. اقىرى ساعات تابىلىپ، يەسىنە قايتارىلادى.
قالالىق اكىمدىك بۇل جاعدايدى «تۋريستەرگە كورسەتىلەتىن جوعارى دەڭگەيدەگى قىزمەت پەن ازاماتتاردىڭ وتىنىشىنە مۇقيات قاراۋدىڭ ۇلگىسى» دەپ باعالادى. اكىمدىكتەگىلەردىڭ ايتۋىنشا، تۋريست VIP ادام بولماعان جانە ءوتىنىش ادەتتەگىدەي تارتىپپەن قارالعان.
دەگەنمەن الەۋمەتتىك جەلى قولدانۋشىلارى بۇل ارەكەتتى سىنعا الدى. ولار شەنەۋنىكتەردى ادام رەسۋرسىن ورىنسىز پايدالاندى دەپ ايىپتاپ، قاراپايىم ساعات ءۇشىن جۇمىسشىلاردىڭ ەڭبەگىن قور ەتۋ دۇرىس ەمەس ەكەنىن ايتتى. كەيبىرەۋلەر مۇنداي ساعاتتار بار بولعانى 15-22 مىڭ تەڭگە تۇراتىنىن جازدى.
كۇشەيىپ جاتقان سىنعا بايلانىستى بيلىك وكىلدەرى تۇسىنىكتەمە بەرىپ، جۇمىسشىلاردىڭ جەلدەتىلەتىن، جابىق عيماراتتا جۇمىس ىستەگەنىن جانە ولاردىڭ ادالدىعى ءۇشىن ماراپاتتالعانىن ايتتى.
