قىتايدا 31-تامىز بەن 1- قىركۇيەك ارالىعىندا شاڭحاي ىنتىماقتاستىق ۇيىمىنىڭ سامميتى وتەدى
استانا. قازاقپارات - 20 دان اسا ەلدىڭ كوشباسشىلارى جانە 10 حالىقارالىق ۇيىمنىڭ باسشىلارى قىتايدىڭ تيانجين قالاسىندا وتەتىن شاڭحاي ىنتىماقتاستىق ۇيىمىنىڭ (ش ى ۇ) سامميتى مەن وعان بايلانىستى شارالارعا قاتىسادى، دەپ حابارلايدى شينحۋا.
بۇل تۋرالى سەيسەنبى كۇنى ق ح ر سىرتقى ىستەر ءمينيسترى ۆان ي مالىمدەدى.
ق ح ر سىرتقى ىستەر ءمينيسترى جانە ق ح ر ورتالىق كوميتەتىنىڭ ساياسي بيۋروسىنىڭ مۇشەسى ۆان ي ش ى ۇ باس حاتشىسى نۇرلان ەرمەكبايەۆپەن بىرگە تيانجيندە وتكەن بىرلەسكەن باسپا ءسوز كونفەرەنسياسىندا تيانجيندەگى ش ى ۇ سامميتىنىڭ 31- تامىزدان 1- قىركۇيەككە دەيىن وتەتىنىن حابارلادى.
سونداي-اق سول كۇنى ۆان ي تيانجيندە ش ى ۇ مۇشە مەملەكەتتەردىڭ سىرتقى ىستەر مينيسترلەرىنىڭ كەڭەسى وتىرىسىنا ءتوراعالىق ەتتى.
وتىرىسقا قازاقستاننىڭ ۆيتسە-پرەمەرى، سىرتقى ىستەر ءمينيسترى مۇرات نۇرتىلەۋ، پاكىستاننىڭ ۆيتسە- پرەمەرى، سىرتقى ىستەر ءمينيسترى مۇحامماد يسحاق دار، بەلارۋستىڭ سىرتقى ىستەر ءمينيسترى ماكسيم رىجەنكوۆ، ءۇندىستاننىڭ سىرتقى ىستەر ءمينيسترى سۋبرامانيام دجايشانكار، يراننىڭ سىرتقى ىستەر ءمينيسترى ابباس اراگچي، قىرعىزستاننىڭ سىرتقى ىستەر ءمينيسترى جەەنبەك قۋلۋبايەۆ، رەسەيدىڭ سىرتقى ىستەر ءمينيسترى سەرگەي لاۆروۆ، تاجىكستاننىڭ سىرتقى ىستەر ءمينيسترى سيرودجيددين مۋحريددين، وزبەكستاننىڭ سىرتقى ىستەر ءمينيسترى باحتيەر سايدوۆ، ش ى ۇ باس حاتشىسى نۇرلان ەرمەكبايەۆ جانە ش ى ۇ ايماقتىق انتيتەرروريستىك قۇرىلىمىنىڭ اتقارۋشى كوميتەتىنىڭ ديرەكتورى ۇلاربەك شارشەيەۆ قاتىستى.
ۆان ي ش ى ۇ مۇشە مەملەكەتتەرىن ۇيىمدى نىعايتۋ ماسەلەلەرىندە كەڭ كەلىسىمگە ۇمتىلۋعا شاقىرىپ، تاريح پەن بولاشاق الدىنداعى جاۋاپكەرشىلىكتى كورسەتۋ كەرەكتىگىن باسا ايتتى. قىتايلىق ديپلومات ش ى ۇ- نى دامىتۋعا بەس ۇسىنىس جاسادى.
ول مۇشە مەملەكەتتەر باستاپقى ماقساتتارىنان تايماي، «شاڭحاي رۋحىن» ناسيحاتتاپ، قاۋىپسىزدىكتىڭ نەگىزىن كۇشەيتىپ، ءوزارا تيىمدىلىككە جەتۋگە، دامۋ قوزعالتقىشىن ىنتالاندىرۋعا، دوستىق پەن كورشىلىك قارىم-قاتىناستى نىعايتۋعا، سونداي-اق ادالدىق پەن ادىلدىكتى قولداۋعا ءتيىس ەكەنىن اتاپ ءوتتى.
ۆان ي قىتايدىڭ ش ى ۇ- عا ءتوراعالىق ەتۋ بارىسىنداعى جۇمىسىنا ريزاشىلىعىن ءبىلدىرىپ، ۇيىمنىڭ بىرلەسكەن كۇش-جىگەرى ارقىلى جاڭا ساپالى دامۋ كەزەڭىنە وتەتىنىنە سەنىم ارتتى.
وتىرىسقا قاتىسۋشىلار قىتايدىڭ ءتوراعالىق ەتكەن كەزەڭدەگى ەلەۋلى جۇمىستارىن جوعارى باعالاپ، تيانجيندەگى سامميتتىڭ تابىستى ءوتۋى ءۇشىن قىتاي تاراپىمەن ۇيلەسىمدىلىك پەن ىنتىماقتاستىقتى جالعاستىرۋعا دايىن ەكەندەرىن ايتتى.
