قىتاي يراننىڭ ەگەمەندىگى مەن اۋماقتىق تۇتاستىعىنا قول سۇعۋعا قارسى

استانا. KAZINFORM - قىتاي يزرايلدىڭ يرانعا جاساعان سوققىسىنا الاڭداۋشىلىق ءبىلدىرىپ، مۇنداي ارەكەتتەردىڭ سالدارى وتە اۋىر بولۋى مۇمكىن ەكەنىن ەسكەرتتى. بۇل تۋرالى جۇما كۇنى وتكەن بريفينگ بارىسىندا ق ح ر سىرتقى ىستەر مينيسترلىگىنىڭ رەسمي وكىلى لين تسزيان مالىمدەدى.

- قىتاي يزرايلدىڭ يرانعا جاساعان سوققىسىنا الاڭداۋلى جانە بۇل ارەكەتتەردىڭ سالدارى اۋىر بولۋى مۇمكىن ەكەنىن ەسكەرتەدى. قىتاي تاراپى يراننىڭ ەگەمەندىگىنە، قاۋىپسىزدىگىنە جانە اۋماقتىق تۇتاستىعىنا قول سۇعۋعا، سونداي-اق قايشىلىقتاردى ۋشىقتىرىپ، قاقتىعىستىڭ اۋقىمىن كەڭەيتۋگە ءۇزىلدى- كەسىلدى قارسى، - دەپ كەلتىرەدى Xinhua قىتاي س ءى م وكىلىنىڭ ءسوزىن.

ونىڭ ايتۋىنشا، ايماقتاعى جاعداي قايتا شيەلەنىسىپ وتىر، بۇل ەشبىر تاراپتىڭ مۇددەسىنە ساي كەلمەيدى.

بۇدان ءارى ول قىتايدىڭ بارلىق مۇددەلى تاراپتاردى وڭىرلىك بەيبىتشىلىك پەن تۇراقتىلىقتى قامتاماسىز ەتۋگە جانە شيەلەنىستىڭ ودان ءارى ۋشىعۋىنا جول بەرمەۋگە شاقىراتىنىن اتاپ ءوتتى.

- قىتاي جاعدايدى تۇراقتاندىرۋعا باعىتتالعان كۇش-جىگەرگە كونسترۋكتيۆتى تۇردە قاتىسۋعا دايىن، - دەدى ديپلومات.