قىتاي قازاقستاننان مال شارۋاشىلىعى ونىمدەرىن اكەلۋگە قويىلعان شەكتەۋلەردى الىپ تاستادى
استانا. قازاقپارات - 2024 -جىلعى 7-اقپاننان باستاپ قازاقستاننان قىتايعا قۇس شارۋاشىلىعى ونىمدەرىن اكەلۋگە ەنگىزىلگەن جانە وسىعان دەيىن قولدانىستا بولعان اۋسىل بويىنشا شەكتەۋلەر الىنىپ تاستالدى. بۇل تۋرالى ق ر اۋىل شارۋاشىلىعى مينيسترلىگىنىڭ باسپا ءسوز قىزمەتى حابارلادى.
قۇس شارۋاشىلىعى ونىمدەرىن اكەلۋگە تىيىم سالۋ 2005 -جىلدان باستاپ جالعاسىپ كەلەدى، ال اۋسىل بويىنشا شەكتەۋلەر 2022 -جىلى ەنگىزىلگەن ەدى. شەكتەۋلەردى الىپ تاستاۋ ق ر وڭتۇستىك- شىعىس وڭىرلەرىنەن قىتايعا مۇزداتىلعان سيىر جانە شوشقا ەتىن، سونداي-اق، قۇس شارۋاشىلىعى ونىمدەرىنىڭ كەڭ اۋقىمىن ەكسپورتتاۋدى قايتا باستاۋعا مۇمكىندىك بەرەدى.
ەڭ ماڭىزدىسى ەندى قازاقستان ەكسپورتتىق تاۋارلار جەلىسىن كەڭەيتۋ بويىنشا ۆەتەرينارلىق تالاپتاردى كەلىسۋ ءراسىمىن، سونداي-اق قازاقستاننىڭ بارلىق اۋماعىنان كاسىپورىنداردان ەكسپورتتاۋعا كەلىسىم الۋ بويىنشا جۇمىستى باستاي الادى.
تىيىم سالۋلاردى الىپ تاستاۋ تۋرالى شەشىم ق ر پرەزيدەنتى قاسىم-جومارت توقايەۆتىڭ 2023 -جىلى ق ح ر-عا رەسمي ساپارىنان كەيىن قابىلداندى. وسى ساپارى بارىسىندا مەملەكەت باسشىسى قازاقستاننىڭ قىتايعا مال شارۋاشىلىعى ونىمدەرىن جەتكىزۋگە دايىن ەكەنىن اتاپ وتكەن ەدى.
ق ر پرەمەر-ءمينيسترىنىڭ ورىنباسارى سەرىك جۇمانعارين دە كورشى ەلدىڭ ءتيىستى سالالارىمەن ءبىرقاتار كەلىسسوزدەر جۇرگىزدى. ال، 2023 -جىلعى قاراشادا ق ر اۋىل شارۋاشىلىعى ءمينيسترى ايداربەك ساپاروۆ ق ح ر باس كەدەن باسقارماسىنىڭ ءتوراعاسى يۋي جيانحۋامەن رەسمي كەزدەسۋ وتكىزگەن بولاتىن.
2023 -جىلى قىتايلىق تاراپ قۇس تۇماۋى مەن اۋسىل بويىنشا قاۋىپ- قاتەرگە باعالاۋ جۇرگىزدى. جەلتوقسان ايىندا ق ح ر گ ت ۋ ساراپشىلار توبى مەن ق ح ر اۋىل شارۋاشىلىعى جانە اۋىلدىق ىستەر مينيسترلىگىنىڭ قازاقستانعا ساپارى اياسىندا جوعارىدا اتالعان اۋرۋلارعا جەتكىلىكتى باقىلاۋدى قامتاماسىز ەتۋ تۇرعىسىنان ۆەتەريناريالىق قاداعالاۋ قىزمەتىنە اۋديت جۇرگىزىلدى.
ق ر اۋىل شارۋاشىلىعى مينيسترلىگى قىتايعا ەكسپورتقا باعىتتالعان كاسىپورىندار ءتىزىلىمىن كەڭەيتۋ بويىنشا جۇمىستى جالعاستىرادى. بۇل وقيعا قازاقستاندىق اگروبيزنەسكە ءوز ونىمدەرىن اسپان استى ەلىنىڭ نارىعىنا شىعارۋعا جاڭا مۇمكىندىكتەر اشادى.
