قىتاي- قازاقستان قارىم-قاتىناسىنداعى كورنەكتى ون باعىت - شەتەلدەگى قازاق باسپا ءسوزى
«KAZINFORM» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
وزبەكستان، ازەربايجان جانە قازاقستان «جاسىل» ەنەرگەتيكا ءدالىزى تۋرالى كەلىسىمگە قول قويدى - «ءوز ا»
وزبەكستان، قازاقستان جانە ازەربايجان ماگيسترالدى ەلەكتر جەلىلەرى وپەراتورلارى ەۋروپاعا «جاسىل ەنەرگەتيكا ءدالىزىن» قۇرۋ جوباسى اياسىندا ورتاق كاسىپورىن قۇرۋ تۋرالى كەلىسىم جاساستى، دەپ حابارلايدى وزبەكستاندىق «ءوز ا» اقپارات اگەنتتىگى.
اتالعان ب ا ق-تىڭ مالىمەتىنشە، كەلىسىم ءۇش ەلدىڭ ەلەكتر جەلىلەرى وپەراتورلارى - ازەربايجاننىڭ Azerenerji، قازاقستاننىڭ KEGOC جانە وزبەكستاننىڭ «ۇلتتىق ەلەكتر جەلىلەرى» اراسىندا بەينەكونفەرەنتسيا فورماتىندا بەكىتىلدى.
قۇجات ءۇش مەملەكەت باسشىلارى 13-قاراشادا قول قويعان كەلىسىمدى جۇزەگە اسىرۋعا، سونداي-اق ەۋروپالىق وداقتىڭ «جاسىل كەلىسىم» باستاماسىن (2050 -جىلعا دەيىن پارنيكتىك گازداردىڭ جانە قورشاعان ورتانىڭ لاستانۋىن تولىقتاي جويۋ جوسپارى) ەسكەرە وتىرىپ، ەلەكتر ەنەرگياسى ساۋداسىنىڭ مۇمكىندىكتەرىن كەڭەيتۋگە باعىتتالعان.
سونداي-اق وسى اپتادا «ءوز ا» - دا «كوجيكودە قالاسىندا كەرەمەت مۇراجاي بار» دەگەن تاقىرىپتاعى اقپارات جاريالاندى.
وزبەكستاندىق ب ا ق-تىڭ دەرەگىنشە، كوجيكودە قالاسى ءۇندىستاننىڭ كەرالا شتاتىندا، اراب تەڭىزىنىڭ جاعالاۋىندا ورنالاسقان حالقى تىعىز قونىستانعان مەكەننىڭ ءبىرى. بۇل ەجەلگى قالادا بالىق اۋلاۋ، مارجان تەرۋ جانە كەمە جاساۋ ونەركاسىبى جاقسى دامىعان.
قالانىڭ قاق ورتاسىندا كەمە جاساۋ مۇراجايى ورنالاسقان. مۇراجايعا جارتى عاسىر بۇرىن حوجي احامەد كويا نەگىز قالاعان. مۇندا ءۇندىستاننىڭ كەمە جاساۋ تاريحىنا قاتىستى سيرەك كەزدەسەتىن كوللەكتسيالار ساقتالعان.
ايتا كەتەيىك، كەلۋشىلەر بۇل جەردەن اتالمىش سالاعا بايلانىستى قىزىقتى ءارى قۇندى اقپارات الا الادى. سونداي-اق مۇراجايدا ءتۇرلى سيرەك كىتاپتار، كومپاستار مەن باسقا دا زاتتاردىڭ كونە ۇلگىلەرى، سونداي-اق كەمەلەر مەن قايىقتاردىڭ شاعىن ماكەتتەرى قويىلعان.
50 مىڭ جىلدان كەيىن ادامدار قانداي بولادى - «ParsToday»
50 مىڭ جىلدان كەيىن ادامدار قانداي بولادى؟ بۇل قىزىقتى سۇراقتىڭ جاۋابى «ParsToday»- دەگى جاڭالىقتار شولۋىندا بەرىلگەن.
اتالعان جاڭالىقتار شولۋى «18 يراندىق ايەل الەمدەگى ەڭ كوپ سىلتەمە جاسالعان عالىمداردىڭ ءبىرى»، «ادامدار 50 مىڭ جىلدان كەيىن قانداي بولادى؟»، «امەريكاداعى Microsoft كورپوراتسياسى مونوپولياعا قارسى زاڭداردى بۇزدى» جانە «الەمنىڭ ۇزدىك 100 باعدارلاماشىسىنىڭ تەھرانداعى باسەكەلەستىك جولىندا» قاتارلى تاقىرىپتار بويىنشا توقتالعان.
اتالعان ب ا ق-تا حابارلاعانداي، يراننىڭ سيناي قالاسىنداعى شاريف جانە بوالي تەحنولوگيالىق ۋنيۆەرسيتەتتەرىنىڭ پروفەسسورى مۇستافا رۋستاميدىڭ ايتۋىنشا، سوڭعى ستاتيستيكالىق مالىمەتتەرگە سايكەس، 18 يراندىق عالىم ايەل الەمدەگى ەڭ كوپ سىلتەمە جاسالعان ايەل عالىمداردىڭ قاتارىندا بولعان. بۇل يسلام مەن يران يسلام رەسپۋبليكاسىنداعى ايەلدەردىڭ ىلگەرىلەۋىنىڭ بەلگىسى ەكەن.
انتاليادا تۋريستىك رەكورد جاڭاردى - TRT
2024 -جىلى انتالياعا 17 ميلليون 278 مىڭ 103 تۋريست كەلگەن.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
اتالعان ب ا ق-تا حابارلاعانداي، انتاليادا تۋريستىك رەكورد جاڭاردى. 2024 -جىلى قالاعا كەلۋشىلەردىڭ جالپى سانى 17 ميلليون 278 مىڭ 103 بولدى. بۇل كورسەتكىشپەن انتاليا ءبىر جىلدا قوناق ەتكەن جالپى تۋريست سانى بويىنشا ەڭ جوعارى كورسەتكىشكە جەتتى. 2024 -جىلى انتالياعا كەلگەن تۋريست سانى وتكەن جىلدىڭ سايكەس كەزەڭىمەن سالىستىرعاندا 8 پايىزعا ارتقان.
وتكەن جىلعى قىتاي- قازاقستان قارىم-قاتىناسىنداعى نىعايعان ون باعىت - «حالىق گازەتى»
اتاپ ايتقاندا، 2024 -جىلى قىتاي- قازاقستان اراسىنداعى تۇراقتى جانە جان-جاقتى ستراتەگيالىق سەرىكتەستىكتى اشقان جوعارى دەڭگەيدەگى ساپارلار جيىلەگەن. سونداي-اق، تۋريزم جىلى دا ءساتتى ءوتتى. وسى اپتادا قىتايدىڭ «حالىق گازەتى» قازاق ءتىلدى سايتى وتكەن ءبىر جىل ىشىندەگى قىتاي مەن قازاقستان قارىم-قاتىناسىنىڭ ەلەۋلى جەتىستىكتەرى جونىندە بەرگەن اقپاراتىنا شولۋ جاساپ، تومەندەگىدەي ون تۇيىنگە جيناقتاعان.
ۆيزادان بوساتۋدىڭ ارقاسىندا ەكى ەل اراسىنداعى بارىس- كەلىس ارتقان. وتكەن جىلى ەكىجاقتى ساۋدا تەرەڭدەپ، ءوزارا بايلانىس جەدەلدەگەن. سونىمەن قاتار قىتاي- ەۋروپا پويىزى كەرەمەت ناتيجەلەرگە قول جەتكىزدى جانە ترانسكاسپيي حالىقارالىق كولىك مارشرۋتى اشىلعان. ەكى ەل اراسىنداعى اۋىل شارۋاشىلىعى ىنتىماقتاستىعى تەرەڭدەدى. ءبىلىم بەرۋ سالاسىنداعى ىنتىماقتاستىقتا نىعايعان. سونداي- اق كينو جانە تەلە حيكايالار الماسۋى دا وركەندەگەن.
سونداي-اق وسى اپتادا «حالىق گازەتىندە» «ەلشى حان چۋنلين قازاقستان سىرتقى ىستەر ءمينيسترىنىڭ ءبىرىنشى ورىنباسارى ا. راحمەتۋللينمەن كەزدەسىپ، سەنىم گراموتاسىنىڭ كوشىرمەسىن تاپسىردى» دەگەن تاقىرىپتاعى اقپارات جارىق كوردى.
2024 -جىلعى 31-جەلتوقساندا قىتايدىڭ قازاقستانداعى ەلشىسى حان چۋنلين قازاقستان سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللينمەن كەزدەسىپ، سەنىم گراموتاسىنىڭ كوشىرمەسىن ۇسىندى، دەپ جازادى قىتايلىق «حالىق گازەتى» باسىلىمى.
اتالعان باسىلىمنىڭ مالىمەتىنشە، ەلشى ق ح ر ءتوراعاسى شي جينپيڭنىڭ بۇيرىعىمەن قىتاي حالىق رەسپۋبليكاسىنىڭ قازاقستان رەسپۋبليكاسىنداعى 12-ىنشى توتەنشە جانە وكىلەتتى ەلشىسى قىزمەتىنە تاعايىندالۋى ۇلكەن مارتەبە ەكەنىن ايتتى. ول قازاقستانمەن تىعىز قارىم- قاتىناس ورناتۋعا جانە شىن جۇرەكتەن ىنتىماقتاسۋعا، تاعدىرى ورتاق قىتاي-قازاقستان قاۋىمداستىعىنىڭ تەرەڭدەۋى مەن جۇزەگە اسىرىلۋىنا ىقپال ەتۋگە جانە ەكى ەل اراسىنداعى قارىم-قاتىناستىڭ كەلەسى «التىن وتىز جىلدىعىنا» ۇلەس قوسۋعا دايىن ەكەنىن جەتكىزدى.
ا. راحمەتۋللين ەلشى حان چۋنليندى جاڭا قىزمەتىمەن قۇتتىقتادى. ەكى مەملەكەت كوش باسشىلارىنىڭ باسشىلىعىمەن قازاقستان- قىتاي قارىم-قاتىناسى تاريحتاعى ەڭ جاقسى دەڭگەيگە جەتكەنىن ايتتى.
تاراپتار نەگىزگى باعىتتاردا ىنتىماقتاستىقتى نىعايتۋ ماسەلەلەرى بويىنشا پىكىر الماستى.
سونىمەن قاتار قىتايدىق «حالىق گازەتى» باسىلىمىندا «شينجاڭدا الەمدەگى ەڭ ۇزىن جوعارى جىلدامدىقتى تۋننەل سالىندى» دەگەن تاقىرىپتاعى اقپارات جارىق كوردى.
اتالعان ب ا ق-تىڭ دەرەگىنشە، شينجاڭداعى «تيانشان شىڭلي» تۋننەلى 30-جەلتوقساندا اياقتالدى. بۇل جاڭا تۋننەل قارلى تاۋدى كەسىپ وتەدى جانە ول الەمدەگى ەڭ ۇزىن تاس جول تۋننەلى سانالادى.
«تيانشان شىڭلي» تۋننەلى - شينجاڭنىڭ سولتۇستىگى مەن وڭتۇستىگىن بايلانىستىراتىن ماڭىزدى وتكەل. 22، 13 شاقىرىمدىق تۋننەل اشىلعاننان كەيىن تيانشان تاۋىنىڭ ورتاڭعى بولىگىن كەسىپ وتۋگە كەتەتىن ۋاقىت بىرنەشە ساعاتتان 20 مينۋتقا قىسقارادى.
ايتا كەتەيىك، بۇل ءۇرىمجى- لوپنۇر جوعارى قارقىندى تاسجولىنىڭ نەگىزگى جوباسى. ونى 2025 -جىلى اياقتاپ، پايدالانۋعا بەرۋ جوسپارلانىپ وتىر. جوبانىڭ ارقاسىندا ەكى باعىت اراسىنداعى كولىكپەن ءجۇرۋ ۋاقىتى شامامەن جەتى ساعاتتان ءۇش ساعاتقا دەيىن قىسقارادى.
«تيانشان شىڭلي» تۋننەلىنىڭ قۇرىلىسى 2020 -جىلدىڭ ساۋىرىندە باستالىپ، 5 جىلعا جۋىق ۋاقىتقا سوزىلعان.
اۆتور
بەيسەن سۇلتان ۇلى
