قىتاي مۇحيتتى زەرتتەۋگە ارنالعان ينتەللەكتۋالدى كەمە جاساپ شىعاردى
استانا. KAZINFORM - شانحايدا اۆتونومدى ناۆيگاتسيا جانە اقىلدى باسقارۋ جۇيەلەرىمەن جابدىقتالعان العاشقى ينتەللەكتۋالدى زەرتتەۋ كەمەسى «تۋنتسزي» پايدالانۋعا بەرىلدى، دەپ حابارلايدى China Daily.
كەمە شانحايداعى تۋنتسزي ۋنيۆەرسيتەتىنىڭ تاپسىرىسى بويىنشا قىتايدىڭ مەملەكەتتىك كەمە جاساۋ كورپوراتسياسى تاراپىنان جاسالعان. ول تەڭىز عىلىمي ەكسپەديتسيالارىن جۇرگىزۋگە، جاعالاۋ قۇرىلىسى بويىنشا تاپسىرمالاردى ورىنداۋعا، تەڭىز جانە ينجەنەرلىك ماماندىقتار بويىنشا وقيتىن ستۋدەنتتەردىڭ تاعىلىمدامادان ءوتۋىن ۇيىمداستىرۋعا ارنالعان.
ينجەنەرلەردىڭ ايتۋىنشا، جاڭا ازىرلەمە تەڭىز گەولوگياسى، بيولوگياسى، حيمياسى جانە ونىمەن بايلانىستى پاندەر سياقتى سالالاردا زەرتتەۋلەر جۇرگىزۋگە ارنالعان كوپ فۋنكتسيونالدى قالقىمالى كەشەن.
«تۋنتسزي» قىتاي كلاسسيفيكاتسيا قوعامىنىڭ ستاندارتى بويىنشا اقىلدى كەمە مارتەبەسىن العان العاشقى عىلىمي كەمە، دەدى جوبانىڭ باس كونسترۋكتورى لي چجەنحۋا.
ەلەكترلى رەاكتيۆتى قوزعالتقىشى بار كەمەنى جاعادان، قاشىقتان باسقارۋعا بولادى. ول اشىق سۋ ايدىندارىندا اۆتونومدى ناۆيگاتسيامەن جانە ەنەرگيانى باسقارۋدىڭ ينتەللەكتۋالدى جۇيەسىمەن جابدىقتالعان. «تۋنتسزي» مۇزدى ايماقتاردى قوسپاعاندا، كەز كەلگەن ايماقتاردا جۇرە الادى.
ۇزىندىعى - 81,5 م، ەنى - 15 م، سۋ تارتۋى - 6,9 م. وعان 45 ادام سىيادى جانە 27 ك م/ساع دەيىن جىلدامدىققا جەتەدى. اۆتونومدى ءجۇزۋ دياپازونى 80000 تەڭىز ءميلى، سۋدا ۇزاقمەرزىمدى جۇرە الۋى 35 كۇنگە دەيىن.
