قىتاي كومپانيالارى قازاقستاننىڭ اگروونەركاسىپ كەشەنىنە ينۆەستيتسيا سالۋعا قىزىعۋشىلىق تانىتىپ وتىر

استانا. KAZINFORM - اۋىل شارۋاشىلىعى ۆيتسە- ءمينيسترى امانعالي بەردالين اگروونەركاسىپتىك كەشەندى دامىتۋعا قىزىعۋشىلىق بىلدىرگەن قىتايلىق ينۆەستيتسيالىق كومپانيالاردىڭ وكىلدەرىمەن كەزدەسۋ وتكىزدى. بۇل تۋرالى مينيسترلىكتىڭ باسپاءسوز قىزمەتى مالىمدەدى.

كەزدەسۋدىڭ نەگىزگى تاقىرىپتارىنىڭ ءبىرى - ق ح ر نارىعىندا جوعارى سۇرانىسقا يە وتاندىق جىلقى تۇقىمدارىن ەكسپورتتاۋ ماسەلەسى بولدى.

- بۇگىنگى كەزدەسۋ - مال شارۋاشىلىعى مەن جالپى اۋىل شارۋاشىلىعى سالاسىنداعى ءوزارا ءتيىمدى ىنتىماقتاستىقتى نىعايتۋ جولىنداعى ماڭىزدى قادام. ءبىزدىڭ جىلقى تۇقىمدارىمىزعا دەگەن قىزىعۋشىلىق جاڭا مۇمكىندىكتەرگە جول اشادى، - دەپ اتاپ ءوتتى ۆيتسە- مينيستر.

تاراپتار ۆەتەريناريالىق باقىلاۋ مەن كارانتينگە ارنالعان ينفراقۇرىلىمدى قۇرۋ ماسەلەلەرىنە ەرەكشە نازار اۋداردى. قىتايلىق ينۆەستورلار قازاقستان اۋماعىندا ۆەتەريناريالىق زەرتحانا اشۋ نيەتىن ءبىلدىردى.

بۇل ورتالىق اۋىل شارۋاشىلىعى جانۋارلارىنىڭ ەلدەر اراسىنداعى قوزعالىسى كەزىندە دياگنوستيكانى جانە بيولوگيالىق قاۋىپسىزدىكتى قامتاماسىز ەتۋمەن اينالىسادى. سونىمەن قاتار، كەزدەسۋ بارىسىندا كليماتتىڭ وزگەرۋىنە بايلانىستى جانە مال شارۋاشىلىعى ءۇشىن ساپالى ازىق راتسيونىن قامتاماسىز ەتۋ قاجەتتىگى اياسىندا وسىمدىكتەردى جەم دايىنداۋ ءۇشىن قارقىندى پايدالانۋدىڭ زاماناۋي ادىستەرى تالقىلاندى.

- ءبىز قازاقستاندى تۇراقتى اۋىل شارۋاشىلىعىن دامىتۋداعى ستراتەگيالىق سەرىكتەس رەتىندە قاراستىرامىز. زەرتحانالار مەن جەم وندىرىسىنە ينۆەستيتسيا - بۇل ءبىزدىڭ ورتاق بولاشاققا قوسقان ۇلەسىمىز، - دەدى قىتاي دەلەگاتسياسىنىڭ وكىلى ۆان چجيفەن.

مينيسترلىك اگروونەركاسىپتىك كەشەندى دامىتۋ مەن ەلدىڭ ەكسپورتتىق الەۋەتىن ارتتىرۋعا باعىتتالعان باستامالاردى قولداۋعا جانە ودان ءارى ديالوگقا دايىن ەكەنىن راستادى.