قىتاي كومپانيالارى ەلىمىزدىڭ سۋ سالاسىن سيفرلاندىرۋعا اتسالىسپاق
استانا. KAZINFORM – ق ح ر ءتوراعاسى شي جينپيڭنىڭ قازاقستانعا مەملەكەتتىك ساپارى اياسىندا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ءبىرقاتار قىتايلىق ءىرى كومپانيالارمەن كەزدەسۋ وتكىزدى.
مينيستر ەڭ الدىمەن قىتاي ازاماتتىق ينجەنەرلىك- قۇرىلىس كورپوراتسياسىنىڭ ۆيتسە-پرەزيدەنتى تسزيان يگاومەن كەزدەستى. كومپانيا قازاقستاندا 2017 -جىلدان بەرى جۇمىس ىستەيدى. قازىرگى ۋاقىتتا قىتاي ازاماتتىق ينجەنەرلىك-قۇرىلىس كورپوراتسياسىڭ جامبىل وبلىسىنداعى يرريگاتسيالىق ارنالاردى، درەناج جۇيەلەرى مەن قۇرىلىستاردى رەكونسترۋكتسيالاۋدى قوسا العاندا، اۋقىمدى 5 جوبانى ىسكە اسىرىپ جاتىر.
تاراپتار سۋارۋ جۇيەلەرىن سيفرلاندىرۋ جانە وسى باعىتتاعى ەكىجاقتى ىنتىماقتاستىقتى تالقىلادى. قىتاي ازاماتتىق ينجەنەرلىك- قۇرىلىس كورپوراتسياسىنىڭ وكىلدەرى قازاقستاننىڭ سۋ سالاسىن سيفرلاندىرۋ جانە اۆتوماتتاندىرۋ بويىنشا جاڭا جوبالارعا قىزىعۋشىلىق تانىتتى.
«سيفرلىق تەحنولوگيالار داقىل تۇرلەرىنە، كليماتقا جانە اۋماققا بايلانىستى سۋدى ءدال جانە ۋاقتىلى ءبولۋدى قامتاماسىز ەتە وتىرىپ، سۋ رەسۋرستارىن باسقارۋدىڭ تيىمدىلىگىن ايتارلىقتاي ارتتىرۋعا مۇمكىندىك بەرەدى. بىرلەسكەن كۇش-جىگەر، رەسۋرستار مەن تاجىريبەنى پايدالانا وتىرىپ الدىمىزدا تۇرعان ماقساتتارعا قول جەتكىزە الاتىنىمىزعا سەنىمدىمىن»، - دەدى نۇرجان نۇرجىگىتوۆ.
ودان كەيىن مينيستر CITIC Gonstruction كومپانياسىنىڭ پرەزيدەنتى جيانچيان يانمەن كەزدەسىپ، سۋ ۇنەمدەۋ تەحنولوگيالارىن ەنگىزۋ ماسەلەسىن تالقىلادى. قىتايلىق كاسىپكەرلەر قازاقستاندا سۋ ۇنەمدەۋ جۇيەلەرىن شىعارۋعا دايىن ەكەندىكتەرىن ءبىلدىردى.
نۇرجان نۇرجىگىتوۆ ءوز كەزەگىندە جاڭا سۋ قويمالارىن سالۋ جانە قولدانىستاعى سۋ قويمالارىن رەكونسترۋكسيالاۋ، سونداي-اق الماتى مەن جەتىسۋ وبلىستارىنداعى سۋارۋ جۇيەلەرىن جاڭعىرتۋ جونىندەگى مينيسترلىكتىڭ جوسپارلارى تۋرالى ايتىپ بەردى.
سونداي-اق، مينيستر Power China كومپانياسىنىڭ پرەزيدەنتى تان سياوفەنمەن كەزدەستى. ق ر سۋ رەسۋرستارى جانە يرريگاتسيا مينيسترلىگى مەن Power China قازاقستاندىق سۋ شارۋاشىلىعى ماماندارىن قىتايدا بىلىكتىلىك ارتتىرۋ كۋرستارىنان وتەدى دەپ كەلىستى.
سونىمەن قاتار، نۇرجان نۇرجىگىتوۆ قىتايلىق كومپانياعا «قازسۋشار» كاسىپورنىمەن ىنتىماقتاستىق تۋرالى مەموراندۋمعا قول قويۋدى ۇسىندى. Power China باسشىلىعى بولسا جاڭا سۋ قويمالارىنىڭ قۇرىلىسىنا قاتىسۋعا نيەت ءبىلدىردى. بۇل ماسەلەنى ەگجەي-تەگجەيلى تالقىلاۋ الداعى ۋاقىتتا جۇمىس توبى دەڭگەيىندە جالعاسادى.
«Power China قازاقستاندا بۇرىننان تابىستى جۇمىس ىستەپ كەلەدى. كومپانيا ءبىزدىڭ ەلىمىزدە بىرنەشە اۋقىمدى جوبانى جۇزەگە اسىردى، سوندىقتان ءبىز ءوزارا ءتيىمدى ىنتىماقتاستىققا نيەتتىمىز. بۇل ءبىزدىڭ بىرلەسكەن جوبالارىمىزدى عىلىمي سۇيەمەلدەۋدى تيىمدىرەك ەتەدى»، - دەدى نۇرجان نۇرجىگىتوۆ.
ءمينيستردىڭ China Energy International Group كومپانياسىنىڭ باسقارما ءتوراعاسى ليۋ جەسيانمەن كەزدەسۋىندە قازاقستاننىڭ سۋ قويمالارىندا سۋ ەلەكتر ستانسيالارىنىڭ قۇرىلىسى تالقىلاندى. قىتايلىق كاسىپكەرلەر اتالعان جوباعا قىزىعۋشىلىق تانىتتى. تاراپتار بۇل ماسەلەنى تولىعىراق تالقىلاۋعا كەلىستى.
China Energy International Group وكىلدەرى قازاقستاننىڭ سۋ سالاسىن سيفرلاندىرۋ جانە اۆتوماتتاندىرۋ جوبالارىنا قاتىسۋعا نيەت ءبىلدىردى. سونىمەن قاتار، قىتايلىق كومپانيا ەلىمىزدە اعىندى سۋلاردى تازارتۋ قوندىرعىلارىن ورناتۋعا دايىن.
اۆتور
ايدار وسپاناليەۆ
