قىتاي جاستارىنىڭ سالاۋاتتى ءومىر سالتىنا قىزىعۋشىلىعى ارتىپ كەلەدى

استانا. KAZINFORM - قىتايداعى ەلەكتروندىق كوممەرتسيا پلاتفورمالارىندا جاستار، اسىرەسە جاس قىزدار، دەنساۋلىقتى ساقتاۋ ونىمدەرىنىڭ باستى تۇتىنۋشىلارىنا اينالعان، دەپ حابارلايدى شينحۋا.

ءداستۇرلى قىتاي مەديتسيناسى (د ق م) اۋرۋحانالارىندا «ۇلتتىق دەنساۋلىقتى نىعايتاتىن ونىمدەر»، سونىڭ ىشىندە تسۋكات قوسىلعان ءتاتتى كۇرىش بوتقاسى - باباوفان، جاستار اراسىندا كەڭ تانىمال. يممۋنيتەتتى كۇشەيتەتىن ءارتۇرلى ونىمدەر دە جاستار ءۇشىن «ءتورتىنشى اسقا» اينالىپ كەلەدى.

مۇنداي ۇردىستەر قىتاي ءۇشىن جاڭالىق ەمەس. جاس قىتايلىقتار دەنساۋلىققا كوبىرەك كوڭىل ءبولىپ، جاڭا ساۋىقتىرۋ ترەندىن قالىپتاستىرىپ جاتىر.

اعا بۋىننىڭ دەنساۋلىقتى ساقتاۋعا قاتىستى ءداستۇرلى تاسىلدەرىنەن ايىرماشىلىعى - جاستار تەك «ىستىق سۋ ءىشىپ» نەمەسە «يممۋنومودۋلياتورلاردى قابىلداپ» قويماي، سالاۋاتتى ءومىر سالتىن كۇندەلىكتى ومىرلەرىنىڭ بارلىق سالاسىنا ەنگىزۋگە تىرىسادى.

قىتاي قوعامدىق عىلىمدار اكادەمياسىنىڭ ازىق-تۇلىك جانە فارماتسيەۆتيكا ونەركاسىبىن دامىتۋ جانە قاداعالاۋ عىلىمي-زەرتتەۋ ورتالىعىنىڭ باسشىسى جاڭ يۋنجياننىڭ ايتۋىنشا، ءبىلىم دەڭگەيىنىڭ ارتۋى، دەنساۋلىق ساقتاۋ سالاسىنداعى عىلىمي اقپاراتتارعا قولجەتىمدىلىكتىڭ جەڭىلدەۋى جانە سوزىلمالى اۋرۋلاردىڭ جاسارۋ ءۇردىسى جاستاردى دەنساۋلىقتارىنا كوبىرەك كوڭىل بولۋگە يتەرمەلەپ وتىر.

قىتاي ونەركاسىپتىك زەرتتەۋ ينستيتۋتىنىڭ مالىمەتىنشە، 15-25 جاس ارالىعىنداعى جاستار دەنساۋلىقتى ساقتاۋ نارىعىنىڭ نەگىزگى تۇتىنۋشىلارىنا اينالعان، ال بۇل سالاداعى ادىستەر بارعان سايىن ءارتاراپتاندىرىلىپ كەلەدى.

سوڭعى ۋاقىتتا قىتايلىق ۆەيبو الەۋمەتتىك جەلىسىندە «د ق م سالونىنىڭ تانىمالدىعى ءسۇتتى شاي ساتاتىن ورىنداردان اسىپ ءتۇستى» دەگەن حەشتەگ ترەندكە اينالدى. جاستاردىڭ تالعامىن ەسكەرە وتىرىپ، كەيبىر د ق م ءدارىحانالارى ءسۇت قوسىلعان ارنايى شايلار مەن قىشقىل ورىك سورپاسىن ازىرلەپ، ولاردى شيپالى تاعامدارمەن بىرگە ۇسىنا باستادى.

سىچۋان پروۆينسياسىنىڭ (وڭتۇستىك- باتىس قىتاي) چىڭدۋ قالاسىنداعى ءبىرىنشى حالىقتىق اۋرۋحانا جىل مەزگىلىنە ساي دقم تاسىلدەرىنە نەگىزدەلگەن ارنايى ەمدىك تاعامداردى ساتادى.

- كۋركۋما مەن دارشىن قوسىلعان ءسۇتتى شاي جاستارعا قاتتى ۇنايدى، - دەدى اۋرۋحانانىڭ كلينيكالىق ديەتولوگيا ءبولىمىنىڭ ورىنباسارى ليۋ يان.

جاستاردىڭ سالاۋاتتى ءومىر سالتىنا قىزىعۋشىلىعى ارتقان سايىن، دەنساۋلىق ساقتاۋ ونىمدەرى يندۋسترياسى دا بەلسەندى دامىپ كەلەدى. iiMedia Research ماركەتينگ اگەنتتىگىنىڭ ەسەبىنە سايكەس، سوڭعى بەس جىلدا بۇل نارىق تۇراقتى تۇردە ءوسىپ وتىر. 2027 -جىلعا قاراي ونىڭ كولەمى 423,7 ميلليارد يۋانعا (شامامەن 59,1 ميلليارد ا ق ش دوللارى) جەتەدى دەپ كۇتىلەدى.

- ساتىپ الۋشىلار ءسۇتتى شايدى تاڭداعاندا، قانت پەن ماي مولشەرى از، قۇرامىندا نە بار ەكەنى انىق كورسەتىلگەن ونىمدەردى قالايدى، - دەيدى جيلين پروۆينسياسىنىڭ چاڭچۋن قالاسىنداعى كونديتەرلىك دۇكەن قىزمەتكەرى.

ونىڭ ايتۋىنشا، ءىرى برەندتەر پايدالى ينگرەديەنتتەردى قولدانۋعا كوبىرەك كوڭىل بولە باستادى، ال ولاردىڭ ونىمدەرى دۇرىس تاماقتانۋدى ۇستاناتىن جاستار اراسىندا كەڭ سۇرانىسقا يە.

بۇدان بولەك، عىلىمي- تەحنيكالىق قۇرالدار دا جاستارعا دەنساۋلىقتى نىعايتۋدا كومەك كورسەتىپ كەلەدى. مىسالى، اقىلدى بىلەزىكتەر سياقتى دەنساۋلىقتى تەكسەرۋگە ارنالعان قۇرىلعىلاردىڭ كەڭ تارالۋى جەكە دەنساۋلىقتى باقىلاۋدى جەڭىلدەتىپ، تيىمدىلىگىن ارتتىرعان.

2024 -جىلدىڭ ءبىرىنشى توقسانىنداعى مالىمەت بويىنشا، قىتاي نارىعىندا كيىلەتىن قۇرىلعىلاردىڭ جەتكىزىلىمى %36,2 عا ءوسىپ، 33,67 ميلليونعا جەتكەن. كەيبىر اقىلدى ساعات جۇرەك سوعىسى مەن قاننىڭ وتتەگىمەن قانىعۋ دەڭگەيىن باقىلاۋ سياقتى دەنساۋلىققا قاتىستى كەڭەيتىلگەن فۋنكتسيالارعا يە بولا باستادى.

- دەنساۋلىقتى ساقتاۋ بۇرىنعىداي جاي كەڭەس ەمەس، قازىرگى جاستار ءۇشىن كۇندەلىكتى ءومىردىڭ سانالى ءارى ەستەتيكالىق ءبىر بولىگىنە اينالدى، - دەدى «جينايتان» دەنساۋلىق مەنەدجمەنتى كومپانياسىنىڭ باس ديرەكتورى ليۋ جيۋنكاڭ.

ونىڭ ايتۋىنشا، جاستار اراسىندا دەنساۋلىقتى ساقتاۋعا بايلانىستى ءۇش نەگىزگى ءۇردىس بايقالادى: جەكە كۇن ءتارتىبىن دەرەكتەر نەگىزىندە رەتتەۋ، ءداستۇرلى ەمدەۋ ادىستەرىن زاماناۋي تۇرعىدان قايتا پايىمداۋ جانە دەنساۋلىقتى ساقتاۋدىڭ جاعىمدى ءارى ءتيىمدى تاجىريبەسىنە باسىمدىق بەرۋ. بۇل ۇردىستەر ەلدەگى دەنساۋلىق ساقتاۋ يندۋسترياسىنىڭ قۇرىلىمىن وزگەرتىپ جاتىر.