قىتاي حالقى قازاق حالقىنا ەشقاشان زيان كەلتىرگەن جوق، بولاشاقتا دا زيان كەلتىرمەيدى - توقايەۆ

قازاقستان حالقى اسسامبلەياسىنىڭ 34- سەسسياسىندا مەملەكەت باسشىسى قاسىم-جومارت توقايەۆ قازاقستاننىڭ كورشى ەلدەرىمەن قارىم-قاتىناسى جونىندە ايتتى، دەپ حابارلايدى Ulysmedia.kz.

توقايەۆ نە دەيدى

توقايەۆتىڭ ايتۋىنشا، قازاق قاشاندا كورشىسىن قادىرلەي بىلگەن. قۋانىشتا دا، قيىندىقتا دا كورشىسىنە سۇيەنگەن، كورشىنىڭ قاسىنان تابىلعان. «كورشى اقىسى - ءتاڭىر حاقىسى» دەگەن ۇعىم دىنىمىزدە جانە داستۇرىمىزدە بار.

بۇل - بىزگە اتادان قالعان وسيەت، انادان بەرىلگەن قاسيەت. حالقىمىزدىڭ تاتۋ كورشىلىك ءداستۇرى ءالى دە جالعاسىپ كەلەدى. قونىستاس ادامدار ۇلتىنا، دىنىنە، تىلىنە قاراماستان ارالاسىپ، قۇرالاسىپ جاتادى. قازاقستان كورشى مەملەكەتتەرمەن دوستىقتى نىعايتا تۇسۋگە ايرىقشا ءمان بەرەدى.

رەسەي - قازاقستاننىڭ بۇرىننان كەلە جاتقان نەگىزگى ستراتەگيالىق سەرىكتەسى ءارى سەنىمدى وداقتاسى. قىتاي ەلىمەن ىقپالداستىق تامىرى دا تەرەڭدە جاتىر. قىتاي حالقى قازاق حالقىنا ەشقاشان زيان كەلتىرگەن جوق، بولاشاقتا دا زيان كەلتىرمەيدى. الاتاۋدى تەڭ جايلاعان قىرعىزدار - ءبىر تۋعان باۋىرلارىمىز. ەجەلدەن ەنشىلەس وزبەك اعايىندى ءوز اعام دەپ قادىر تۇتامىز. ءتۇبىمىز ءبىر دەپ تۇرىكمەندەردى تۋىس ساناپ، شىن جۇرەكتەن قۇرمەتتەيمىز. قارت كاسپيدىڭ جاعاسىنداعى ازەربايجان ەلىنە دەگەن ىقىلاسىمىز دا ەرەكشە. ءبىر سوزبەن ايتساق، كورشى ەلدەرمەن قارىم-قاتىناسىمىز باۋىرلاستىق رۋحىندا دامىپ كەلەدى. ءبىزدىڭ ارامىزدا تۇيتكىلدى ماسەلە جوق. قازاقستان مەن رەسەي قۇرلىقتاعى ەڭ ۇزىن شەكارانى اۋەل باستان داۋ-دامايسىز شەگەندەپ الدى. جاقىندا قىرعىزستان، وزبەكستان جانە تاجىكستان ۇزاق جىل بويى شەشىمىن تاپپاعان شەكارا ماسەلەسى بويىنشا ورتاق مامىلەگە كەلىپ، تاريحي كەلىسىمگە قول قويدى دەپ ايتۋعا بولادى. ءبىز باۋىرلاس ەلدەر ءۇشىن قۋانامىز، ولاردى ءاردايىم قولدايمىز، - دەدى پرەزيدەنت.

قاسىم-جومارت توقايەۆ قازىرگىدەي اۋمالى-توكپەلى زاماندا اۋىزبىرشىلىكتىڭ ءقادىرى ارتا تۇسكەنى ءسوزسىز ەكەنىن، بەيبىتشىلىك پەن تۇراقتىلىق - تاعدىردىڭ بىزگە بەرە سالعان سىيى ەمەس ەكەنىن ايتتى.

بۇل - ءبىر ەل، ءبىر حالىق بولىپ اتقارىپ جاتقان قاجىرلى ەڭبەكتىڭ جەمىسى. ءبىز سىندارلى ساتتە جۇرت بولىپ جۇمىلا بىلەمىز. بۇعان بىلتىر اقتاۋ ماڭىندا ۇشاق اپاتى بولعاندا تاعى ءبىر مارتە كوزىمىز جەتتى. ازاماتتارىمىز زارداپ شەككەن ادامداردان كومەگىن اياعان جوق. كەزەككە تۇرىپ، قان تاپسىردى. ازەربايجان ەلشىلىگىنە بارىپ، گۇل شوقتارىن قويدى. بۇكىل الەم حالقىمىزدىڭ ۇيىمشىلدىعى مەن جاناشىرلىعىنا ءتانتى بولدى. حالقىمىزدىڭ جۇرەگى - كەڭ، پەيىلى - اق، نيەتى - تازا. مەيىرىمدىلىك، قامقورلىق جانە تىلەۋلەستىك - ءبىزدىڭ ۇلتتىق ەرەكشەلىگىمىز. ءبىز وسى قۇندىلىقتارىمىزدى ساقتاپ، وسكەلەڭ ۇرپاقتىڭ بويىنا ءسىڭىرۋىمىز كەرەك، - دەدى ول.