قىتاي بالاباقشاسىنداعى وقيعا: 70 تەن استام ءبۇلدىرشىن قورعاسىنمەن ۋلاندى
استانا . KAZINFORM - قىتايدىڭ گانسۋ پروۆينتسياسىنا قاراستى تيانشۋي قالاسىنداعى جەكەمەنشىك بالاباقشالاردىڭ بىرىندە بالالار جاپپاي قورعاسىنمەن ۋلانعانى انىقتالدى.
رەسمي مالىمەتتەرگە سايكەس، تيانشۋي قالاسىنىڭ مايتسزي اۋدانىنا قاراستى حەشيشي پەيسين (褐石培心) بالاباقشاسىندا 74 بالانىڭ قانىنداعى قورعاسىن مولشەرى قالىپتى دەڭگەيدەن ايتارلىقتاي جوعارى بولعان. ونىڭ ىشىندە 70 بالادا ۋلانۋ بەلگىلەرى انىقتالىپ، قان قۇرامىنداعى قورعاسىن 200- 500 مكگ/ل دەڭگەيىندە بايقالعان. ەڭ جوعارى كورسەتكىش — 528 مكگ/ل.
بالالاردىڭ اتا-انالارى بيىلعى ناۋرىز- ماۋسىم ايلارىندا بۇلدىرشىندەرىنىڭ باس اينالۋ، ءىش اۋىرۋ، قۇسۋ، شاش ءتۇسۋ، ءتىس قارايىپ كەتۋ سەكىلدى بەلگىلەرگە شاعىمدانىپ، دابىل قاققان. الايدا جەرگىلىكتى دەنساۋلىق ساقتاۋ مەكەمەلەرىنىڭ العاشقى تالداۋلارى قان قۇرامىنداعى قورعاسىن دەڭگەيى «قالىپتى» دەگەن قورىتىندى شىعارعان.
كوپتەگەن اتا-انا بۇلدىرشىندەرىن سيان قالاسىنا اپارىپ، تاۋەلسىز زەرتحانالاردا قايتا تەكسەرتكەن كەزدە ۋلانۋ بەلگىلەرى ايقىن انىقتالعان.
The Paper اقپارات اگەنتتىگىنىڭ جازۋىنشا، بالالاردى ۋلاندىرعان نەگىزگى سەبەپ - بالاباقشادا بەرىلگەن ازىق- تۇلىكتەن. اسىرەسە، «ءۇش ءتۇستى قۇرما ءبالىشى» مەن جۇگەرى شۇجىعىنىڭ قۇرامىنان قالىپتى مولشەردەن الدەقايدا كوپ قورعاسىن تابىلعان.
كەي دەرەكتەر بويىنشا، بالاباقشادا قولدانىلعان نان اشىتقىسىنىڭ ارزان ءارى زاڭسىز وندىرىلگەن ءتۇرى (باعاسى - 12 يۋان/ك گ، شامامەن 750 تەڭگە) قولدانىلعان. ونىڭ قۇرامىنداعى قورعاسىن مولشەرى بىرنەشە ەسە جوعارى بولعان.
قازىرگى تاڭدا وقيعا بويىنشا قىلمىستىق ءىس قوزعالىپ، بالاباقشا باسشىلىعى مەن ازىق- تۇلىك جەتكىزۋشىلەرگە قاتىستى تەرگەۋ جۇرگىزىلۋدە. سونىمەن قاتار، بالاباقشانىڭ اسحاناسىنداعى ازىق- تۇلىك ۇلگىلەرى ارنايى ساراپتاماعا جىبەرىلگەن.
جەرگىلىكتى بيلىك پەن قوعامدىق دەنساۋلىق ساقتاۋ باسقارماسى 200 دەن استام سىناما الىپ، تالداۋلاردى گانسۋ پروۆينتسياسىنىڭ جۇقپالى اۋرۋلار ورتالىعىنا جىبەردى.
بالالاردى ەمدەۋ ءىسى شيان قالالىق ورتالىق اۋرۋحاناسىندا جۇرگىزىلىپ جاتىر. بۇل جەردە بالالارعا ارنايى جاسىل ءدالىز اشىلىپ، كەشەندى ەمدەۋ (تامىر ىشىنە ءدارى جىبەرۋ، ۋ قايتارۋ تەراپياسى، ارنايى ديەتا، پسيحولوگيالىق كومەك) ۇيىمداستىرىلعان.
دارىگەرلەردىڭ ايتۋىنشا، كەيبىر بالالار ۇزاق مەرزىمدى باقىلاۋدى قاجەت ەتەدى، سەبەبى قورعاسىن بالانىڭ جۇيكە جۇيەسىنە اۋىر اسەر ەتەدى.
اتالعان جاعداي قىتايداعى بالالاردىڭ دەنساۋلىعىنا قاتىستى الاڭداۋشىلىقتى كۇشەيتتى. ەلدەگى الەۋمەتتىك جەلىلەردە بۇل وقيعا قىزۋ تالقىلانىپ، قوعامدىق رەزونانس تۋدىردى.
قىتايدا بالالاردىڭ قورعاسىنمەن ۋلانۋى العاش رەت تىركەلىپ وتىرعان جوق. 2009 -جىلى شەنسي ولكەسىندەگى فەنسيان اۋدانىندا 800 دەن استام بالا جەرگىلىكتى قورعاسىن زاۋىتىنىڭ لاستاۋىنان كەيىن ۋلانعان. سول جىلى حۋنان ولكەسىنىڭ ۋگان قالاسىندا تاعى دا مىڭداعان بالا قورعاسىن زاۋىتىنان زارداپ شەككەن. بۇل وقيعالاردان كەيىن قىتاي ۇكىمەتى ونەركاسىپ نىساندارىنا باقىلاۋدى كۇشەيتۋدى ۋادە ەتكەن ەدى.
دەگەنمەن، ارادا ون جىلدان استام ۋاقىت وتسە دە، تيانشۋيدەگى وقيعا ازىق- تۇلىك قاۋىپسىزدىگى مەن مەكتەپكە دەيىنگى مەكەمەلەردەگى باقىلاۋ جۇيەسىنىڭ ءالسىز ەكەنىن كورسەتتى. بۇل - قاۋىپسىزدىك شارالارى مەن سانيتارلىق ستاندارتتاردىڭ تولىق ساقتالماي وتىرعانىنىڭ دالەلى.
دەنساۋلىق ساقتاۋ سالاسىنىڭ ماماندارى بالاباقشالاردا بەرىلەتىن ازىق- تۇلىك ونىمدەرىن قاتاڭ باقىلاۋعا الۋدى، مەكتەپكە دەيىنگى ۇيىمداردىڭ جەتكىزۋشىلەرى مەن تاعام تەحنولوگيالارىن تولىقتاي تەكسەرۋدى ۇسىنادى.
سونىمەن قاتار، بالالارداعى اۋىر مەتالل قالدىقتارىنىڭ اسەرىن ازايتۋ ءۇشىن ۇزاق مەرزىمدى مەديتسينالىق جانە پسيحولوگيالىق قولداۋ قاجەت.
بەيجىڭ مەن سيان قالالارىنداعى جەتەكشى توكسيكولوگ مامانداردىڭ پىكىرىنشە، قان قۇرامىنداعى قورعاسىن 200 مكگ/ل- دەن اسسا، جۇيكە جۇيەسىنە قايتىمسىز زاقىم كەلۋى مۇمكىن. سوندىقتان مۇنداي جاعدايلاردا تەز ارادا ارنايى ۋ قايتارۋ شارالارى مەن نۋتريتسيالىق تەراپيانى كەشىكتىرمەي باستاۋ قاجەت.
قازىرگى تاڭدا تەرگەۋ امالدارى جالعاسۋدا. جەرگىلىكتى بيلىك بارلىق كىنالىلەردىڭ قاتاڭ جازالاناتىنىن مالىمدەدى.
ايتا كەتەيىك، قىتاي ەۋروپالىق وداقتان كەلەتىن الكوگول ونىمدەرىنە سالىقتى ءوسىردى.
